Moskvada rekord darajada qalin qor yog‘di

Bugun, 27 aprel kuni Rossiya poytaxti Moskva shaxrida qalin qor yog‘ib, 55 yillik rekord yangilandi. Bu haqda RIA Novosti xabar berdi. 

Fobos ob-havo markazining yetakchi mutaxassisi Mixail Leusning so‘zlariga ko‘ra, bugun Moskvada yog‘gan qorning miqdori 55 yillik rekordni yangilagan. 

“Ertalabgacha poytaxtda 12 santimetr qor yog‘di. Shu kunga qadar kuzatilgan avvalgi rekord 10 santimetr edi. Bu rekordning yangilanishiga 55 yil ketdi”, deydi Mixail Leus. 

Xabarga ko‘ra, poytaxt mintaqasida erta tongdan beri kuchli yog‘ayotgan qor oqibatida daraxtlar qulab tushmoqda va elektr uzatish liniyalari yopishib qolmoqda. Shuningdek, oylik yog‘ingarchilikning yarmidan ko‘pi allaqachon yog‘ib bo‘lgan. 

Rasmiylar qor bo‘ronlari, muzliklar va quruq momaqaldiroqlar kuchayishi kutilayotgani sababli to‘q sariq rangli ogohlantirish e’lon qilgan, ko‘plab parklar yopilgan. Shu bilan birga, Moskvada yozgi shinalari bo‘lgan elektr skuterlar, velosipedlar va avtomobil uchun mo‘ljallangan transport vositalarini ijaraga olish to‘xtatilgan. 

Aholiga, ayniqsa shinalarini almashtirganlarga metrodan foydalanish va iloji bo‘lsa, mashina haydashdan qochish tavsiya etilgan. Moskva viloyatining ayrim hududlarida vaqtincha elektr uzilishlari kuzatilgan va favqulodda ta’mirlash ishlari boshlangan. 

Shaharlararo va uzoq masofali poyezdlar kechikayotgani, Vnukovo va Jukovskiyda esa kechikishlar qayd etilgani ma’lum qilingan. 

Qayd etilishicha, sinoptiklar qor yog‘ishi kechqurungacha kamayishini, ammo ertaga, 28 aprelgacha davom etishini taxmin qilmoqda. Shuningdek, ob-havo joriy yil 29 aprelgacha yaxshilanmasligi hamda shahar xizmatlari yiqilgan daraxtlarni tezda kesish va olib tashlash uchun astoydil harakat qilayotgani aytib o‘tilgan. 

Eslatib o‘tamiz, avvalroq Jazoirning shimoliy qismidagi Sahroi Kabir hududida joylashgan Ayn as-Safra qishlog‘i aholisi noodatiy tabiiy hodisaga guvoh bo‘lgandi. Xususan, qishloq atrofida qor yog‘ib, odatda oltin rangda tovlanib turadigan sahro qumlari oppoq qor bilan qoplangan edi.

Shahzoda Shukurullayeva