Moldovadagi prezidentlik saylovida Sandu g‘alaba qozondi

Moldovaning amaldagi Prezidenti Mayya Sandu prezidentlik saylovlarining ikkinchi bosqichida 55,04 foiz, uning raqibi Aleksandr Stoyanoglo esa 44,96 foiz ovoz oldi. Bu Markaziy saylov komissiyasi tomonidan byulletenlarning 98,92 foizi sanab chiqilgandan so‘ng e’lon qilingan ovoz berishning dastlabki natijalaridir.

Moldovaning o‘zida byulletenlarning 100 foizi sanab chiqildi. MSK ma’lumotlariga ko‘ra, mamlakat ichida aholi asosan Stoyanogloga ovoz bergan. U 36 ta hududning 19 tasida g‘olib chiqdi. Sandu 48,81 foiz ovoz olgan. O‘z navbatida, xorijiy uchastkalarda byulletenlarning 89,18 foizi sanab chiqilgandan so‘ng, Sandu 82,33 foiz natija bilan yetakchilik qilmoqda. Stoyanoglo 17,67% ga ega.

Moldovaning amaldagi rahbari Mayya Sandu prezidentlik saylovlarining ikkinchi bosqichida g‘alaba qozonganini e’lon qildi.

“Moldova, bugun siz g‘alaba qozondingiz. Biz birgalikda birligimiz, demokratiyamiz va munosib kelajakka sodiqligimizni namoyish qildik. Rahmat, aziz moldovaliklar”, deb yozdi u X sahifasida.

Yevropa komissiyasi rahbari Ursula fon der Lyayen Moldovaning amaldagi Prezidenti Mayya Sanduni prezidentlik saylovlarining ikkinchi bosqichidagi g‘alabasi bilan tabrikladi.

“Bu saylovda duch keladigan qiyinchiliklarni yengish uchun kamdan kam kuch kerak. Men Moldova va uning xalqining Yevropa kelajagi yo‘lida siz bilan hamkorlikni davom ettirishni intiqlik bilan kutaman”, deb yozdi Yevrokomissiya rahbari X ijtimoiy tarmog‘ida.

Fransiya Prezidenti Emmanuel Makron ham Sanduni qayta saylangani bilan tabriklab, demokratiya “barcha aralashuv va manyovrlardan ustun kelganini” aytdi.

Ruminiya Bosh vaziri Marchel Cholakuning ta’kidlashicha, yevropaparast Prezidentning g‘alabasi “Moldova xalqining demokratiyani himoya qilish va Yevropa Ittifoqiga qo‘shilish yo‘lini ta’minlashga bo‘lgan irodasining yaqqol dalilidir”.

Polsha hukumati rahbari Donald Tusk ham Moldovadagi saylov natijalariga izoh berdi. Tuskning so‘zlariga ko‘ra, amaldagi prezident Rossiyaning “prezidentlik saylovlariga tajovuzkor va keng ko‘lamli aralashuviga” qaramay, “Moskva favoriti” ustidan g‘alaba qozona olgan. Polsha Bosh vaziri bu tendensiya boshqa mamlakatlarda ham “yaqin kunlar va oylarda” davom etishiga umid bildirdi.