Modrich 13 mavsum deganda Ispaniya kubogida gol kiritdi

Xorvatiya terma jamoasi va “Real” klubi yarim himoyachisi Luka Modrich 13 mavsumlik faoliyati davomida ilk bor Ispaniya kubogida gol urdi. U bu natijaga erishish uchun 30 ta uchrashuvda maydonga tushdi.

7 yanvarga o‘tar kechasi Ispaniya kubogi 1/16 final bosqichida Madridning “Real” klubi mehmonda “Deportivo Mineyra” jamoasini yirik 5:0 hisobida mag‘lub etdi. Uchrashuvning 55-daqiqasida Luka Modrich raqib darvozasini ishg‘ol qildi. 

Shu tariqa, Luka “qirollik klubi” safidagi faoliyati davomida mazkur turnirdagi ilk golini urdi. Bu natija uchun u 30 ta o‘yinda maydonga tushishi kerak bo‘ldi va 2 marta sovrinni qo‘lga kiritdi.

Ma’lumot o‘rnida, 39 yoshli yarim himoyachi “qaymoqranglilar” safiga 2012 yilda kelib qo‘shilgan va uning amaldagi shartnomasi 2025 yilning yoziga qadar mo‘ljallangan. Modrichning narxi “Transfermarkt” portalida 5 million yevroga baholangan.