Misrda fir’avnning 3 ming yillik bilaguzugi yo‘qoldi

Qadimiy Misr fir’avni Amenemopetga (miloddan avvalgi 993–978 yillar hukmronlik qilgan) tegishli oltin bilaguzuk Qohiradagi Milliy muzeyning restavratsiya bo‘limidan yo‘qolib qoldi. Bu haqda Misr Turizm va qadimiy yodgorliklar vazirligi o‘zining Facebook’dagi sahifasida xabar berdi.

Ma’lum qilinishicha, bilaguzukning yo‘qolgani haqida darhol politsiyaga xabar berilgan, uning surati esa barcha aeroportlar, dengiz portlari va quruqlikdagi chegara punktlariga tarqatilgan.

Vazirlik, shuningdek, maxsus qo‘mita tuzgan. Qo‘mita restavratsiya bo‘limida ro‘yxatga olish ishlarini o‘tkazib, boshqa eksponatlar ham yo‘qolmaganini tekshiradi.

Hozircha bilaguzukning yo‘qolishida gumon qilinayotgan shaxslar haqida hech qanday fakt yo‘q.

Ma’lumot uchun, Amenemopet qadimgi Misrning XXI sulolasiga mansub fir’avn bo‘lib, miloddan avvalgi 993 yildan 978 yilgacha hukmronlik qilgan. U asosan Teb shahri va Amon ibodatxonasi bilan bog‘liq diniy hayotni qo‘llab-quvvatlagan. Uning davrida markaziy hokimiyat zaiflashgan, shuning uchun ko‘proq ruhoniylar va mahalliy hokimlar ta’sir kuchiga ega bo‘lgan. Fir’avnning ismi ko‘plab yodgorliklarda va buyumlarda uchraydi, jumladan, oltin taqinchoqlarda. U Amon xudosiga sodiqligi bilan eslab o‘tiladi. Amenemopetning qabri hozirgi kunda Qadimgi Misrshunoslikda muhim tadqiqot ob’ekti hisoblanadi. Shu bilan birga, uning davrida iqtisodiy va siyosiy beqarorlik sezilarli bo‘lgan.