Misrda bortida 45 nafar rossiyalik bo‘lgan batiskaf cho‘kib ketdi

Bugun, 27 mart kuni Misrning Xurgada shahrida sayyohlik batiskafi cho‘kib ketdi. Uning bortida 45 nafar Rossiya fuqarosi, jumladan bolalar ham bo‘lgan. To‘rt nafar sayyoh halok bo‘lgan, bir necha kishini qidirish ishlari davom etmoqda. Bu haqda Rossiyaning Xurgadadagi Bosh konsulxonasi xabar berdi. 

Qayd etilishicha, bugun, 27 mart kuni mahalliy vaqt bilan soat 10:00 da qirg‘oqdan 1 km uzoqlikda “Sinbad” nomli batiskaf avariyaga uchragan. Ushbu suvosti kemasi xuddi shu nomdagi mehmonxonaga tegishli bo‘lgan.

Batiskaf marjon riflarini tomosha qilish uchun rejalashtirilgan suvosti ekskursiyasini amalga oshirayotgan bo‘lgan. Ekipaj a’zolaridan tashqari, bortda 45 nafar sayyoh, jumladan voyaga yetmaganlar ham bo‘lgan va ularning barchasi Rossiya fuqarolari hisoblanadi.

Dastlabki ma’lumotlarga ko‘ra, bortdagilarning aksariyati qutqarilib, Xurgadadagi mehmonxonalar va shifoxonalarga joylashtirilgan. Ularning sog‘lig‘i xavf ostida emas. Ammo to‘rt kishi halok bo‘lgan. Bir necha sayyohning taqdiri hozircha noma’lum.

SHOT ma’lumotiga ko‘ra, halok bo‘lganlar soni olti nafarga yetgan. Batiskaf bortida 15 nafar bola ham bo‘lgan. Cho‘kib ketgan batiskaf 25 metr chuqurlikka sho‘ng‘ib, uzunligi 500 metr bo‘lgan marjon rifini tadqiq qilishni rejalashtirgan.

Eslatib o‘tamiz, avvalroq Italiyaning Turin shahridagi Vittorio Veneto maydoni yaqinida sayyohlik avtobusi Po daryosiga tushib ketgan edi. Avtobusda faqat haydovchi bo‘lgan va u hushsiz holda qutqarib olingan. Shifokorlarning uzoq davom etgan harakatlariga qaramay, u vafot etgan. Hodisa joyiga qutqaruvchilar, jumladan vertolyot ekipaji yetib borgan. Voqea vaqtida boshqa yo‘lovchilar yoki piyodalar jabrlangan bo‘lishi mumkinligi bois qidiruv ishlari olib borilgan, biroq hech kim topilmagan.