Mirziyoyevning surati Koreyaning ommabop jurnali muqovasidan joy oldi

Janubiy Koreyaning eng ommabop nashrlaridan biri – “The Korea Post” jurnalining maxsus soni chop etildi. Uning muqovasidan O‘zbekiston Respublikasi Prezidenti Shavkat Mirziyoyevning surati o‘rin olgan olgan. Bu haqda “Jahon” AA xabar bermoqda. 

Jurnalning maxsus soni O‘zbekiston bilan Koreya Respublikasi o‘rtasida diplomatiya munosabatlari o‘rnatilganining 30 yilligi tadbirlari doirasida ikki mamlakat o‘rtasida o‘zaro almashuvlar yiliga bag‘ishlab chop etilgan. 

Jurnaldan o‘rin olgan maqolalarda 2021 yil dekabr oyida Prezident Shavkat Mirziyoyevning Janubiy Koreyaga amalga oshirgan davlat tashrifi mamlakatlar o‘rtasidagi munosabatlarni sifat jihatdan yangi bosqichga olib chiqqani alohida ta’kidlangan.

“Ikki davlat rahbarlari va delegatsiya vakillari ishtirokida imzolangan hujjatlarda o‘zaro manfaatli hamkorlikni har tomonlama rivojlantirish, diplomatiya munosabatlari o‘rnatilganining 30 yilligini keng nishonlash, ikki xalq o‘rtasidagi do‘stona munosabatlarni mustahkamlash maqsadlari o‘rin olgan”, deb yozadi jurnal.

Maqolada “Yashil” taraqqiyot, raqamlashtirish va kuchli ijtimoiy himoya siyosati sohalari alohida strategik sheriklikning uch muhim yo‘nalishi sifatida belgilangani ta’kidlangan.

Bundan tashqari, ushbu maxsus sonda e’lon qilingan materiallarda O‘zbekiston bilan Koreya Respublikasi o‘rtasidagi diplomatiya aloqalari o‘rnatilganiga 30 yil to‘lishi munosabati bilan o‘zaro munosabatlarning bugungi holati tahlil etilgani barobarida istiqboldagi yo‘nalishlar haqida ham atroflicha fikr yuritilgan.