Mirziyoyev O‘zbekiston qanday davlat ekanini aytdi

O‘zbekiston - dunyoviy davlat va bundan keyin ham shunday bo‘lib qoladi. Bu fikrlarni bugun, 8 may kuni Prezident Shavkat Mirziyoyev referendum yakunlariga bag‘ishlangan chiqishida aytib o‘tdi.

Keltirilishicha, ushbu uchrashuvda bundan buyon ham millati, tili, dini va ijtimoiy kelib chiqishidan qat’i nazar har bir fuqaroning vijdon erkinligi ta’minlanishi, barcha diniy konfessiyalar erkin faoliyat yuritishi uchun zarur shart-sharoitlar yaratib berilishi, mamlakatda millatlar va konfessiyalar o‘rtasida totuvlik va hamjihatlikni ta’minlash siyosati izchil davom ettirilishi ta’kidlangan.

Qayd etilishicha, jamiyatda har qanday radikallashuvga, dindan siyosiy maqsadlarda foydalanishga hech qachon yo‘l qo‘yilmaydi.

“Men Prezident sifatida ish boshlagan birinchi kundanoq “Biz xalqimizga xizmat qilgani kelganmiz”, “Biz xalqni rozi qilishimiz kerak” degan gaplarni doim takrorlayman. Islohotlarni boshlagan paytda o‘zimiz tasavvur ham qilmagan juda ko‘p muammo va sinovlarga duch keldik. Ularga el-yurtimiz bilan birgalikda yechim topib, har bir masalani joyida hal qilib borayapmiz. Chunki, yangilangan Konstitutsiyamizning ma’no-mazmuni, bosh maqsadi ham xalqimizning farovon hayot kechirishi uchun munosib shart-sharoit yaratib berishdan iboratdir”, deydi Shavkat Mirziyoyev.

Prezidentning so‘zlariga ko‘ra, bu maqsad yo‘lida qanchalik og‘ir bo‘lmasin, zarur mablag‘lar, kerak bo‘lsa, ortiqchasi bilan topib, barcha imkoniyatlar ishga solinmoqda.

“Xalqimizning o‘zi – eng adolatli hakam. Men aminman, bugun yurtimizdagi har bir inson “hayotimda ijobiy o‘zgarish bo‘lmoqda”, deb ayta oladi”, deydi Prezident.