Mirziyoyev Toqayevga ta’ziya bildirdi

Bugun, 20 aprel kuni mahalliy vaqt bilan 05:09da Qozog‘istonning Jambil viloyati Qorday tumanidagi “Chimkent-Olma-ota” trassasining 181-kilometrida avtobus ishtirokida yo‘l-transport hodisasi ro‘y bergani, unda 49 yo‘lovchidan 11 nafari vafot etgani haqida xabar bergan edik. 

Prezident Shavkat Mirziyoyev Qozog‘istonning Jambil viloyatida yo‘l-transport hodisasi oqibatida insonlar halok bo‘lgani munosabati bilan Prezident Qosim-Jomart Toqayevga hamdardlik bildirdi. 

Ma’lumot o‘rnida, halok bo‘lganlarning uch nafari O‘zbekiston Respublikasi fuqarolaridir: 

Abduxoliqov O‘rinboy Mirhamid o‘g‘li – 1993 yilda Toshkent viloyati Ohangaron tumanida tug‘ilgan;

Yormekboyeva Dilorom Abduxoliqovna – 1972 yilda Toshkent viloyati Quyichirchiq tumanida tug‘ilgan;

Kalmuratov Alisher Safarbayevich – 1988 yilda Qoraqalpog‘iston Respublikasida tug‘ilgan.

Shuningdek, avtobusda bo‘lgan 32 nafar yo‘lovchi turli darajadagi tan jarohati olgan, ularning 13 nafari O‘zbekiston Respublikasi fuqarolaridir.