Mirziyoyev Parlamentlararo ittifoq raisi va bosh kotibi bilan uchrashdi

Bugun, 8 sentyabr kuni O‘zbekiston Prezidenti Shavkat Mirziyoyev Parlamentlararo ittifoq delegatsiyasi – ushbu nufuzli tuzilma raisi Duarte Pacheko va bosh kotibi Martin Chungongni ham qabul qildi.

Davlat rahbari O‘zbekistonning Parlamentlararo ittifoq bilan sermahsul hamkorligi jadal rivojlanib borayotganini katta mamnuniyat bilan qayd etdi.

Shu kunlarda Toshkent shahrida jahon mamlakatlari parlamentlari ayol rahbarlarining 14-sammiti muvaffaqiyatli o‘tmoqda. Uning kun tartibidan demokratik va ijtimoiy iqtisodiy yangilanishlarni qo‘llab-quvvatlashning samarali institutlarini rivojlantirish, gender siyosatni amalga oshirishga doir global va mintaqaviy ahamiyatga ega muhim masalalar o‘rin olgan.

Bundan tashqari, ushbu nufuzli xalqaro tashkilot bilan birgalikda qator muhim loyihalar amalga oshirildi, Buxoro shahrida Barqaror rivojlanish maqsadlari bo‘yicha parlament forumi va boshqa tadbirlar o‘tkazildi.

Parlamentlararo ittifoqning yuqori darajali vakillari O‘zbekiston yetakchisiga qo‘shma tashabbuslarni ilgari so‘rishda ko‘rsatayotgan har tomonlama ko‘mak uchun minnatdorlik bildirib, Yangi O‘zbekistondagi yangilanishlar va islohotlar dasturini to‘liq qo‘llab-quvvatladilar.

Uchrashuvda barqaror rivojlanish, demokratik qadriyatlarni ilgari surish, yoshlarni qo‘llab-quvvatlash sohalaridagi maqsad va vazifalarga erishish, ittifoqning Innovatsiyalar markazi bilan hamkorlik qilish kabi yo‘nalishlarda o‘zaro manfaatli aloqalarni yanada kengaytirishga alohida e’tibor qaratildi.

Avvalroq Shavkat Mirziyoyev Turkmaniston Milliy Kengashi Majlisi Raisi Gulshat Mammedova va Rossiya Federatsiyasi Federal Majlisi Federatsiya Kengashi Raisining o‘rinbosari Galina Karelovani qabul qilgandi.