Mirziyoyev Hindiston Bosh vaziri bilan uchrashdi

Olam

image

Bugun, 16 sentyabr kuni Samarqandda O‘zbekiston Respublikasi Prezidenti Shavkat Mirziyoyev Shanxay hamkorlik tashkiloti Davlat rahbarlari kengashi majlisida ishtirok etish uchun Samarqandga kelgan Hindiston Respublikasi Bosh vaziri Narendra Modi bilan uchrashuv o‘tkazdi.

Suhbat avvalida O‘zbekiston rahbari oliy martabali mehmonni Hindiston mustaqilligining 75 yilligi bilan samimiy tabriklagan.

Tomonlar o‘zaro manfaatli hamkorlikni yanada chuqurlashtirish va strategik sheriklik munosabatlarini kengaytirish masalalarini muhokama qilgan.

Ikki tomonlama munosabatlarning rivojlanish sur’atlari mamnuniyat bilan qayd etilgan. Tomonlar hamkorlikni o‘zaro manfaatli barcha yo‘nalishlarda yanada kengaytirish borasida birgalikda ishlashga tayyor ekanliklarini ta’kidlaganlar.

Yetakchilar o‘zaro savdo hajmi oshib borayotganini ko‘rsatib o‘tgan. Joriy yil boshidan buyon tovar ayirboshlash 30 foizga o‘sgani, keyingi olti yilda qo‘shma korxonalar soni 5 barobar ko‘paygani qayd etilgan.

IT, sog‘liqni saqlash, farmatsevtika, qishloq xo‘jaligi va turizm sohalarida investitsiya loyihalari muvaffaqiyatli amalga oshirilmoqda. Yaqin yillarda o‘zaro savdoni 1 milliard dollarga yetkazish rejalashtirilgan.

Savdo-iqtisodiy, investitsiyaviy, fan va ta’lim sohalarida hamkorlik qilish dasturlarini, shuningdek, investitsiyalarni rag‘batlantirish va o‘zaro himoya qilish bitimini tez fursatda qabul qilish va amalga oshirish zarurligi aytildi.

Ikki mamlakat hududlari o‘rtasidagi sheriklik munosabatlarini mustahkamlashga alohida e’tibor qaratilgan.

O‘zbekiston Hindiston bilan transport aloqalarini, shu jumladan “Chobahor” portidan foydalangan holda mustahkamlashdan manfaatdor ekani ta’kidlangan.

Madaniy-gumanitar hamkorlikni kengaytirish masalalari muzokaralarning alohida mavzusi bo‘ldi. Keyingi yillarda O‘zbekistonda Hindistonning uchta universiteti ochildi.

Birinchi “Hindiston – Markaziy Osiyo” onlayn sammitining yakunlari yuksak baholandi, ushbu platforma doirasida qabul qilingan kelishuvlarni ro‘yobga chiqarish muhimligi qayd etildi. Hindiston tomoniga BMT Bosh Assambleyasining Markaziy va Janubiy Osiyo o‘rtasida o‘zaro bog‘liqlikni mustahkamlash to‘g‘risidagi rezolyutsiyasini qo‘llab-quvvatlagani uchun minnatdorlik bildirilgan.

Afg‘onistonga insonparvarlik yordamini ko‘rsatish va uning iqtisodiy tiklanishiga ko‘maklashish masalalari yuzasidan fikr almashilgan. Narendra Modi O‘zbekistonning bu boradagi sa’y-harakatlarini olqishlagan.

Hamkorlikning ustuvor yo‘nalishlarida qo‘shma loyiha va dasturlarni ilgari surish bo‘yicha qo‘shimcha choralar ko‘rishga kelishib olingan.


Maqola muallifi

Teglar

Shavkat Mirziyoev Narendra Modi

Baholaganlar

30

Reyting

3.2

Maqolaga baho bering

Doʻstlaringiz bilan ulashing