Messi “Inter Mayami”ga o‘tgach, klubda nimalar o‘zgardi?

Argentinalik hujumchi Lionel Messi AQSHning “Inter Mayami” klubi bilan shartnoma imzolaganidan so‘ng, jamoaning Amerika va dunyo futbolidagi mavqeyi sezilarli darajada ko‘tarildi. 

Jumladan, “Inter Mayami” Messi transferini e’lon qilishi bilanoq klubning Instagram sahifasidagi obunachilar soni 900 mingdan 8 millionga oshib ketdi. Ma’lumot uchun, AQSH klublarining hech biri bu qadar ko‘p obunachiga ega emas.

Shuningdek, argentinalik hali klub safida debyut o‘yinini o‘tkazmagan bo‘lishiga qaramay, klub stadionida o‘tishi rejalashtirilgan uchrashvlar uchun kirish chiptalarining narxi keskin oshib ketdi. Transfergacha 31 dollar bo‘lgan chiptalarni endilikda 152 dollarga xarid qilish mumkin bo‘ladi.

OAVda keltirilgan ma’lumotlarga ko‘ra, Messi jamoa safidagi ilk o‘yinini 21 iyul kuni Liga kubogi doirasida Meksikaning “Krus Asul” klubiga qarshi o‘tkazadi. Mazkur o‘yinga kirish chiptasining narxi o‘rtacha 1248 dollar etib belgilangan. Bu narx esa transfergacha atigi 120 dollarni tashkil qilar edi.

Muhsinjon Umurzoqov