“Mehr-saxovat” ko‘krak nishoni ta’sis etildi

O‘zbekiston Respublikasi Prezidenti “Mehr-saxovat” ko‘krak nishonini ta’sis etish to‘g‘risida”gi farmonni imzoladi.

Farmon bilan beg‘araz homiylik yordami ko‘rsatib kelayotgan fuqarolarni taqdirlash uchun “Mehr-saxovat” ko‘krak nishoni ta’sis etildi.

“Mehr-saxovat” ko‘krak nishoni bilan O‘zbekiston Respublikasi fuqarolari:

•    jahon miqyosida keng tarqalib, global muammoga aylangan koronavirus pandemiyasi davrida, shuningdek, turli tabiiy ofatlar, favqulodda holatlar tufayli el-yurtimiz boshiga tushgan sinovli kunlarda mavjud xavf-xatarlarga qarshi kurashda, ularning oqibatlarini bartaraf etishda mardlik va jasorat namunasini ko‘rsatgani;

•    tanti va olijanob xalqimizning buyuk tarixiy va ma’naviy qadriyatlarini, milliy an’analarini munosib davom ettirib, mehr-oqibat, saxovat va himmat kabi yuksak fazilatlarni ulug‘lab kelayotgani;

•    aholining ijtimoiy himoyaga muhtoj qatlamini har tomonlama qo‘llab-quvvatlash borasidagi ishlarni umumxalq harakati darajasiga ko‘tarishga katta hissa qo‘shgani;

•    xayriya va saxovat mablag‘larini to‘g‘ri va xolis yo‘naltirish, qiyin ahvolga tushgan aholiga o‘z vaqtida beminnat ko‘mak berishdagi tashabbuskorligi;

•    bugungi murakkab va og‘ir sharoitda jamiyatda tinchlik-osoyishtalik, birlik va o‘zaro hamjihatlik muhitini mustahkamlashdagi faolligi;

•    beg‘araz homiylik yordami hamda ezgu ishlari bilan ko‘pchilikka alohida o‘rnak bo‘lgani uchun mukofotlanadi.

O‘zbekiston Respublikasi Vazirlar Mahkamasi ikki hafta muddatda “Mehr-saxovat” ko‘krak nishonlari va ularning guvohnomalarini belgilangan tartibda tayyorlanishini ta’minlaydi.