MDHda rus tili targ‘iboti kuchaytiriladi. To‘qayevning taklifi, Putinning roziligi bilan yangi tashkilot tuzilyapti

Qozog‘iston Prezidenti Qosim-Jomart To‘qayev bugun, 14 oktyabr kuni Ostonada bo‘lib o‘tgan Mustaqil davlatlar hamdo‘stligi shafeligida rus tilini qo‘llab-quvvatlash va targ‘ib qilish bo‘yicha xalqaro tashkilot tuzishni taklif qildi. Bu haqda Rossiya Prezidenti Vladimir Putin MDH Davlat rahbarlari kengashi yig‘ilishida aytib o‘tdi. 

U Rossiya MDH shafeligida rus tilini qo‘llab-quvvatlash va targ‘ib qilish bo‘yicha xalqaro tashkilotni yaratishda maksimal darajada yordam berishini ma’lum qildi. 

Putin 2020 yil dekabr oyida tashkilot rahbarlari 2023 yilni MDHda rus tilini millatlararo muloqot tili sifatida e’lon qilish to‘g‘risida qaror qabul qilganini eslatdi.

“Biz uning boshlanishiga Qozog‘iston Prezidenti Qosim-Jomart To‘qayev tomonidan MDH shafeligida rus tilini targ‘ib qilish bo‘yicha xalqaro tashkilot tuzish bo‘yicha taklif etilgan yangi qiziqarli loyiha bilan yaqinlashayotganimiz ramziy ma’noga ega. Tabiiyki, biz ushbu tashabbusni amalga oshirishga maksimal darajada yordam beramiz”, deb ishontirdi Putin. 

Rossiya Federatsiyasi Prezidenti e’tiborni “bu qandaydir tayyorgarlik emas, bu haqiqatan ham Qozog‘iston prezidentining g‘oyasi” ekanligiga e’tibor qaratdi. 

“Ammo, albatta, Rossiya bunday tashabbusni qo‘llab-quvvatlamasa bo‘lmaydi”, deya qo‘shimcha qildi Rossiya davlati rahbari.

Eslatib o‘tamiz, ushbu yig‘ilishda Vladimir Putin Sankt-Peterburg MDHning madaniy poytaxtiga aylanishini aytdi. Rossiya Prezidenti o‘z hamkasblarini kelasi yili u yerda norasmiy uchrashuv o‘tkazishga taklif qildi.