Mbappe PSJdan ketmasa, katta bonusga ega bo‘ladi

PSJ hujumchisi Kilian Mbappe yozda jamoani tark etmasa, klubdan katta bonus oladi. Bu haqda “RMC Sport” xabar berdi.

Qayd etilishicha, ushbu bonus futbolchining shartnomasida ko‘rsatilgan. Mbappe “klubga sodiqligi uchun” 40 million yevro ishlab olishi mumkin, biroq OAVda Kilian parijliklar bilan shartnomani uzaytirish niyatida emasligi va tez orada “Real” futbolchisiga aylanishi mumkinligi haqida xabarlar tarqamoqda.

24 yoshli futbolchi o‘tgan mavsumda barcha musobaqalarda 43 o‘yinda 41 ta gol urib, 10 ta golga hammualliflik qildi. “Transfermarkt”ga ko‘ra, futbolchi 180 million yevroga baholangan.

Eslatib o‘tamiz, iyul oyi boshida “Real” Mbappeni shu yozda sotib olmasligi xabar qilingandi, biroq biroz vaqt o‘tgach, “Real” va PSJ futbolchi transferi bo‘yicha allaqachon kelishib bo‘lgani haqida xabar berildi. Madrid klubi fransiyalik futbolchining transferi uchun 224 million yevro to‘laydi. Shuningdek, “qaymoqranglilar” yana 56 million yevroni bonus sifatida to‘lashi belgilangan.