Mashinaning ichida 4 kishi  tiriklayin yonib ketdi

Qozog‘istonning Turkiston viloyatida sodir bo‘lgan yo‘l-transport hodisasi oqibatida 4 kishi halok bo‘ldi. Bu haqda mamlakat Ichki ishlar vazirligi axborot xizmati xabar berdi. 

Ma’lum qilinishicha, kecha, 18 avgust kuni soat 23:30 larda Turkiston viloyati hududida harakatlanib ketayotgan Nissan qarama-qarshi yo‘nalishdagi Mercyedes-Benz bilan to‘qnashib YTH sodir etgan. Oqibatda Mercedes-Benz salonida yong‘in yuzaga kelgan va uning ichidagi haydovchi hamda 3 nafar yo‘lovchi tiriklayin yonib ketgan. 

“Avtohalokat oqibatida Mercyedes yonib ketgan va uning salonida bo‘lgan 3 nafar yo‘lovchi va haydovchi voqea joyida halok bo‘lgan”, deyiladi xabarda.

IIVga ko‘ra, mazkur holat yuzasidan tegishli ekspertizalar tayinlangan hamda tergov harakatlari olib borilmoqda. Nissan haydovchisi mamlakat Jinoyat kodeksining 345-moddasi (avtoulovni boshqarayotgan shaxs tomonidan yo‘l harakati qoidalarini yoki transport vositalaridan foydalanish qoidalarini buzish, beparvolik tufayli ikki yoki undan ortiq odamning o‘limiga sababchi bo‘lish) bilan 5 yildan 10 yilgacha ozodlikdan mahrum qilish bilan jazolanishi hamda 7 yilgacha ma’lum lavozimlarni egallash yoki muayyan faoliyat bilan shug‘ullanish huquqidan mahrum qilinishi mumkin.

Eslatib o‘tamiz, avvalroq Qozog‘istonning Olmaota viloyatida sodir bo‘lgan yo‘l-transport hodisasida bir oilaning 3 nafar a’zosi halok bo‘lgan edi. Ma’lum qilinishicha, DAF rusmli benzovoz bilan to‘qnashgan Lexus'ning haydovchisi, uning rafiqasi va bolasi mashina ichida tiriklayin yonib ketgan.