Marhum shayx Ziyovuddinxon ibn Eshon Boboxonning oliy ordeni uning qiziga topshirildi

Bugun, 30 avgust kuni marhum shayx Ziyovuddinxon ibn Eshon Boboxonning qizi Prezident Shavkat Mirziyoyevdan otasi uchun berilgan “Oliy darajali Imom Buxoriy” ordenini qabul qilib oldi. Bu haqda Prezident matbuot xizmati xabar berdi.

Aytish joiz, joriy yilning 27 iyun kuni O‘zbekiston Prezidentining Farmoni bilan shayx Ziyovuddinxon ibn Eshon Boboxon “Oliy darajali Imom Buxoriy” ordeni bilan mukofotlangan edi. Farmonda shayx Ziyovuddinxon ibn Eshon Boboxonning  “g‘oyat murakkab tarixiy sharoitda faoliyat ko‘rsatib, mamlakat va mintaqada islom madaniyati va ilm-fanini rivojlantirish, islom dinining insonparvarlik mohiyati va ezgu g‘oyalarini odamlarga bezavol yetkazishdagi xizmatlari, xalqaro miqyosda dinlararo muloqotni yo‘lga qo‘yish, o‘zaro do‘stlik va hamjihatlikni mustahkamlash, jamiyatda ijtimoiy-ma’naviy muhit barqarorligini ta’minlash ishlariga qo‘shgan ulkan hissasi, diniy va dunyoviy bilimlarni puxta egallagan yetuk mutaxassislarni tayyorlash, yosh avlodni ezgulik va ma’rifat, vatanga muhabbat, milliy va umuminsoniy qadriyatlarga hurmat ruhida tarbiyalash yo‘lidagi yuksak xizmatlari uchun” mazkur mukofot bilan taqdirlangani ma’lum qilingan.

Ziyovuddinxon ibn Eshon Boboxon 1908-1982 yillarda yashagan. U Markaziy Osiyo va Qozog‘iston musulmonlari diniy boshqarmasi ikkinchi raisi, beshta respublika muftiysi (1957-1982) bo‘lgan. Uning xotirasini abadiylashtirish, xotirasini yosh avlodlarga yetkazish maqsadida Toshkent shahridagi masjid va ko‘chaga shayxning nomi berilgan.

Eslatib o‘tamiz, avvalroq marhum shayx Muhammad Sodiq Muhammad Yusufning o‘g‘li, shayx nomidagi masjid imom-xatibi Ismoil Muhammad Yusuf Ko‘ksaroyda Prezident Shavkat Mirziyoyevdan otasi uchun berilgan “Oliy Darajali Imom Buxoriy” ordenini qabul qilib olgan edi.