“Manchester Siti” “Real” vingeriga taklif bilan chiqdi

“Manchester Siti” klubi “Real” futbolchisi Rodrigoni sotib olishga harakat qilmoqda. Bu haqda “Relevo” xabar berdi.

Manbaga ko‘ra, “qirollik klubi” vingeri o‘tgan mavsum oxirida jamoadoshlari Vinisius va Jud Bellingemning soyasida qolib ketganidan norozi bo‘lgan. Braziliyalik futbolchining shaxsiy hayotida ham muammolar paydo bo‘ldi, biroq Rodrigo hech qachon Madrid klubini tark etish istagini bildirmagan.

Keltirilishicha, “shaharliklar” futbolchi uchun mos bo‘lgan taklif bilan chiqqan, lekin 23 yoshli iqtidor bu taklifni qabul qilmadi. U kelajagini “qaymoqranglilar”da ko‘rmoqda, ammo avvalgidan ko‘ra ko‘proq e’tirofga sazovor bo‘lishni xohlaydi. Madridliklar ham Rodrigoni qo‘yib yubormoqchi emas.

Ma’lumot o‘rnida, Rodrigo klub safiga 2019 yilda kelib qo‘shilgan va uning jamoa bilan shartnomasi 2028 yilning 30 iyuniga qadar mo‘ljallangan. Vinger joriy mavsum madridliklar tarkibida barcha musobaqalarda 21 ta o‘yinda maydonga tushib, 6 ta gol urdi va 4 ta assist qayd etdi. Futbolchining narxi “Transfermarkt” portalida 110 million yevro etib belgilangan.