Maktablarda kuzgi ta’til qachon boshlanishi aytildi

Maktabgacha va maktab ta’lim vazirligi tizimidagi umumta’lim, ijod, ixtisoslashtirilgan maktablar o‘quvchilari uchun joriy o‘quv yilining kuzgi ta’tili 4 noyabrdan boshlanib, 10 noyabrgacha davom etadi. Bu haqda vazirlik matbuot xizmati xabar berdi.

Bildirilishicha, II chorak dars mashg‘ulotlari 2024 yil 11 noyabrdan boshlanadi. Shundan kelib chiqadiki, o‘quvchilar keyingi haftadan boshlab bir hafta dam oladi.

Vazirlar Mahkamasining 2017 yilgi 140-sonli qarori bilan tasdiqlangan nizomga muvofiq, o‘quvchilar uchun ta’til kunlari quyidagicha belgilangan:

•  kuzgi ta’til – 4 noyabrdan boshlab 6 kalendar kun;

•  qishki ta’til – 28 dekabrdan boshlab 14 kalendar kun;

•  bahorgi ta’til – 21 martdan boshlab 7 kalendar kun;

•  yozgi ta’til - oxirgi bosqichli nazorat sinovi o‘tkazilgan kundan (bosqichli nazorat o‘tkazilmaydigan sinflar uchun o‘quv yili tugagan kundan) boshlab 1 sentyabrgacha.

1-sinf o‘quvchilari uchun esa fevral oyi davomida qo‘shimcha bir haftalik ta’til belgilanadi.

Ma’lumot uchun, ta’tilning oxirgi kuni bayram (ishlanmaydigan) kunga to‘g‘ri kelib qolgan taqdirda, dars mashg‘ulotlari keyingi ish kunidan boshlab davom ettiriladi.  Bayram (ishlanmaydigan) kunlariga to‘g‘ri kelib qolgan dars mashg‘ulotlarining mavzulari o‘quv dasturlarini ixchamlashtirgan holda keyingi dars mashg‘ulotlarida o‘tkaziladi.