Maxachev nufuzli mukofotning 3 ta nominatsiyasiga da’vogarlik qilmoqda

2023 yil yakuni bo‘yicha World MMA Awards xalqaro mukofotiga nomzodlar ro‘yxati e’lon qilindi. Unga ko‘ra, rossiyalik UFC jangchisi Islom Maxachev 3 ta nominatsiya bo‘yicha mukofotga da’vogarlik qilmoqda.

Qayd etilishicha, yengil vazn toifasidagi UFC kamari sohibi Islom Maxachev joriy yilning 12 fevralida Avstraliyaning Pert shahrida bo‘lib o‘tgan UFC 284 musobaqasida mahalliy sportchi Aleksandr Volkanovski ustidan qozongan g‘alabasi evaziga “yil jangi” nominatsiyasida g‘olib bo‘lishi mumkin. Shuningdek, 2022-yilning 23 oktyabrida Birlashgan Arab Amirliklarining Abu-Dabi shahrida o‘tkazilgan UFC 280 turnirida unga chempionlik unvonini taqdim etgan braziliyalik Charlz Oliveyraga qarshi jang natijasiga asosan, “eng yaxshi sabmishn” egasi hamda “yil jangchisi” bo‘lishga yaqin turibdi. 

Maxachev bilan bir qatorda World MMA Awards 2023 mukofotining “yil jangchisi” nominatsiyasi uchun britaniyalik Leon Edvards, amerikalik Aljameyn Sterling, yangi zelandiyalik Israel Adesanya va Shveysariya vakili Sadibu Si ham ishtirok etmoqda.

Aytish joiz, MMA'dagi eng yaxshilarni aniqlab beradigan bu tashkilot reytingidan rossiyalik yana bir UFC jangchisi Sergey Pavlovich ham o‘rin olgan bo‘lib, u “yilning eng yaxshi xalqaro jangchisi”, “yilning eng yaxshi g‘alabalari” toifasida g‘oliblikni qo‘lga kiritishi mumkin.