Myanmadagi zilzila qurbonlari 2700 dan oshdi

Myanmadagi zilzila qurbonlari soni 2719 kishiga yetdi, yana 4521 kishi jabrlandi. Bu haqda Xitoy markaziy televideniyesi xabar berdi.

“Myanma rahbari Min Aun Xlaynning ma’lum qilishicha, 28 mart kuni Myanmada sodir bo‘lgan kuchli zilzila oqibatida hozirgacha 2719 kishi halok bo‘lgan, 4521 kishi jarohatlangan, 441 kishi bedarak yo‘qolgan”, deyiladi xabarda.

Mahalliy OAVga ko‘ra, halok bo‘lganlar soni 3 mingdan oshishi kutilmoqda.

Qutqaruvchilar Neypido shahrida qulab tushgan bino vayronalarini demontaj qilmoqda.

Dam olish kunlari Myanmaga xalqaro yordam kela boshlagan. Rossiya, Xitoy, Hindiston, Tailand, Malayziya va Singapur gumanitar yuklar va mutaxassislarni jo‘natgan. Keyinchalik  BMTning Myanmadagi vakili Markoliji Korsining ta’kidlashicha, zilziladan oldin mamlakatning 20 millionga yaqin aholisi mojarolar va boshqa ofatlar tufayli yordamga muhtoj bo‘lgan. Yangi fojia vaziyatni yanada og‘irlashtirgan.

Myanmadagi dahshatli zilzila

28 mart kuni ertalab Myanma hududida 7,4 magnitudali kuchli zilzila sodir bo‘ldi. Myanmadagi zilzila oqibatida Iravadi daryosi ustidagi ko‘prik qulab tushdi, Mandalay tarixiy saroyi qisman vayron bo‘ldi. Silkinishlar Xitoy, Tailand va Vetnamda sezilgan. Bangkokda qurilayotgan bino qulab tushgan, 10 kishi halok bo‘lgani va kamida 50 kishi jarohatlangani ma’lum. Tailand hukumati mamlakat poytaxtida favqulodda holat rejimini e’lon qilgan. Qolaversa, 29 mart kuni ham Myanmada yana 5,1 magnitudali zilzila qayd etilgan. Prezident Shavkat Mirziyoyev ham Myanmada yuz bergan kuchli zilzila oqibatida ko‘plab insonlar qurbon bo‘lgani va jarohatlangani, jiddiy talafotlar ko‘rilgani munosabati bilan Myanma Ittifoqi Respublikasi Davlat Kengashi Raisi general Min Aun Hlaingga hamdardlik maktubi yo‘lladi.