Lukashenko o‘zida yo‘q qurol bilan G‘arbga tahdid qildi 

Belarus o‘z hududida nafaqat yadroviy, balki mamlakat muxoliflari tomonidan tahdid tug‘ilgan taqdirda istiqbolli “o‘ta yadroviy” qurollarni ham joylashtirishga tayyor. Bu haqda “abadiy Prezident” bo‘lishga da’vo qilgan Belarus fuqarosi Aleksandr Lukashenko ma’lum qildi.  

“Agar kerak bo‘lsa, raqiblarimiz va dushmanlarimiz tomonidan shunday ahmoqona, foydasiz qadamlar qo‘yilsa, biz hududimizni himoya qilish uchun nafaqat yadroviy qurollarni, balki o‘ta yadroviy, istiqbolli qurollarni ham joylashtiramiz”, degan Lukashenko.

Uning qo‘shimcha qilishicha, agar do‘stona bo‘lmagan davlatlardan tahdidlar bo‘lmasa, Belarusga yadro quroli “100 yil davomida ham kerak emas”. 

Bundan tashqari, Lukashenko Minsk yaqinida Rossiyaning S-400 zenit-raketa komplekslarini joylashtirishi mumkinligini aytgan. Uning tushuntirishicha, S-400 kompleksi hozir Belarusda va Belarus harbiylari uni o‘zlashtirmoqda. 

“Agar kerak bo‘lsa, yana bir nechta moslamalar o‘rnatamiz. Undan ko‘pi bizga kerak emas. Bu uzoqdan, menimcha, 600 kilometrni “ko‘radigan” qurol. Uni qayerga qo‘yamiz? Biz ularni Minskdan sharqda yoki Minsk yaqinida o‘rnatishimiz mumkin va biz Kiyevda, Varshavadan tashqarida va hokazolarda nima qilinayotganini ko‘ramiz”, deya tushuntirgan Lukashenko. 

Shu bilan birga, uning qo‘shimcha qilishicha, S-300 komplekslari Belarus mudofaasi uchun yetarli. 

U, shuningdek, agar Rossiya shunday qilsa, Minsk ham uning ortidan Donetsk va Lugansk Xalq Respublikalari mustaqilligini tan olishi mumkinligini aytgan.

“Biz [Rossiya Prezidenti Vladimir] Putin bilan Rossiya va Belarus uchun vaziyatni yaxshilashga qanday harakat qilishimiz kerakligi haqida kelishib olamiz. Ammo bu qo‘shma qaror bo‘ladi”, deydi u.

Shuningdek, u Donbassdagi vaziyat keskinlashgan taqdirda Rossiyaga har qanday, jumladan, harbiy yordam ko‘rsatishga va’da bergan. 

Ma’lumot o‘rnida, Respublika Sovet Ittifoqi tarkibida bo‘lgan paytda Belarus hududida yadro quroli mavjud edi. SSSR parchalanganidan keyin Belarus Yadro qurolini tarqatmaslik to‘g‘risidagi shartnomaga qo‘shildi. Rossiya, AQSH va Buyuk Britaniya bunga ergashdi, xususan Minskka xavfsizlik kafolatlarini berdi. 

Eslatib o‘tamiz, Lukashenko, agar G‘arb respublikaga 2020 yilgi saylovlardagi kabi hujum qilsa, u abadiy davlat rahbari bo‘lib qolishini aytgandi.