Los-Anjelesdagi yong‘in qurbonlari soni yana bir kishiga ko‘paydi

Los-Anjeles okrugidagi yirik o‘rmon yong‘inlari kamida 25 kishining hayotiga zomin bo‘ldi. Bu haqda kecha, 14 yanvar kuni mahalliy hokimiyat organlariga tayanib, CNN xabar berdi.

17 kishining o‘limi Pasadina shahri yaqinidagi yong‘in bilan bog‘liq, sakkiz kishi Tinch okeani Palisades hududidagi yong‘in tufayli halok bo‘lgan. Los-Anjeles politsiya departamenti matbuot kotibi Stiv Embrix matbuot anjumanida mintaqadagi yana 13 kishi bedarak yo‘qolgan deb hisoblanayotgani, ammo halok bo‘lgan deya taxmin qilinmayotganini aytdi.

Politsiya Tinch okeanidagi Palisadesdagi yong‘inga aloqadorlikda gumon qilingan 14 kishini, jumladan, o‘t qo‘yishda gumon qilingan uch kishini hibsga olgan. Hibsga olish uchun boshqa asoslar orasida komendantlik soatini buzish, o‘zini o‘t o‘chiruvchilar yoki politsiya xodimlari sifatida ko‘rsatish va o‘g‘irlik ham bor.

“Talonchilik nafaqat mulkka qarshi jinoyat, balki evakuatsiya qilingan aholini xavfsizlik hissidan ham mahrum qiladi. Bunga toqat qilib bo‘lmaydi”, deya ta’kidladi Embrix.

Bir necha kun avval politsiya talonchilar sababli yong‘in sodir bo‘lgan hududlarda soat 18:00 dan ertalabki 6:00 gacha komendantlik soati joriy qilgan edi.

Shu bilan birga, Los-Anjeles hukumati yong‘inlarga qarshi kurashda muvaffaqiyat qozonganini e’lon qildi. Xususan, ularning ta’kidlashicha, Tinch okeanidagi Palisadesdagi yong‘in 14 foizga o‘chirilgan, Posadena yaqinidagi yong‘in esa 33 foizga nazoratga olingan.

AQSH Prezidenti Jo Bayden qurbonlarga federal yordam ko‘rsatish imkoniyatini ochish uchun Kaliforniyadagi o‘rmon yong‘inlari hududini “falokat hududi” deb e’lon qildi. Pentagon matbuot kotibi o‘rinbosari Sabrina Singx yong‘inlarga qarshi kurashish uchun Kaliforniyaga qo‘shimcha kuch va texnika yuborilishini aytdi. Uning so‘zlariga ko‘ra, hozirgi ob-havo sharoiti hamda kuchli shamol yong‘inni aviatsiya yordamida o‘chirishni qiyinlashtirmoqda.

Eslatib o‘tamiz, avvalroq AQSHning Kaliforniya shtatidagi o‘rmon yong‘inlari oqibatida halok bo‘lganlar soni 24 kishiga yetgani haqida xabar berilgandi.