Levandovski faqat Ronaldu va Messi erishgan natijani takrorladi

Yevropa Chempionlar ligasi (YeCHL) umumiy bosqichi 5-turidan o‘rin olgan “Brest” bilan o‘yinda (3:0) dubl qayd etgan “Barselona” hujumchisi Robert Levandovski Yevropaning asosiy turnirida 100 ta gollik marrani zabt etdi va hozirga kelib polshalik hujumchining gollari soni 101 taga yetdi.

“Juda baxtliman. 100 yaxshi raqam, lekin men allaqachon 101 ta gol urdim. Ko‘p yillar oldin Chempionlar ligasida 100 dan ortiq gol ura olaman deb o‘ylamagandim. Krishtianu va Messi bilan bir safda bo‘lish ajoyib!” deydi Levandovski.

Qayd etish joiz, bungacha faqat Krishtianu Ronaldu (140) va Lionel Messi (129) Levandovski qayd etgan natijaga erishgan.

Yevropa klublarida to‘p surayotgan hozirgi futbolchilardan Yevropa Chempionlar ligasida 100 ta golga eng yaqin ko‘rsatkichlar Tomas Myuller (54) va Kilian Mbappega (49)  tegishli. Ular mos ravishda “Bavariya” va “Real”da to‘p tepadi.