“Ko‘k dubulg‘alilar” Livan janubidagi missiyasini yakunlayapti

Birlashgan Millatlar Tashkilotining Livan janubidagi tinchlikparvar missiyasining Isroil va Livan o‘rtasidagi “ko‘k chiziq” deb ataladigan hududda patrullik qilishi 2026 yil oxirida yakunlanadi. Bunday qaror kecha, 28 avgust kuni Nyu-Yorkdagi BMT Xavfsizlik kengashi tomonidan qabul qilindi.

Birlashgan Millatlar Tashkiloti Xavfsizlik Kengashi tinchlikparvar kuchlarning mandatini 2025 yil 31 dekabrgacha – missiya tarixidagi so‘nggi muddatga uzaytirish uchun ovoz berdi. BMT rezolyutsiyasida aytilishicha, uning muddati tugagach, Livan hukumati bilan yaqin hamkorlikda missiyaning tashkiliy qismi – “xodimlarini qisqartirish va olib chiqish” boshlanadi. Jarayon bir yil ichida amalga oshiriladi.

Birlashgan Millatlar Tashkilotining Livandagi Muvaqqat kuchlari (UNIFIL) mamlakatda 1978 yildan buyon faoliyat yuritadi va 10 000 dan ortiq harbiy va fuqarolik xodimlaridan iborat. U Isroil va Livan o‘rtasida bufer bo‘lib xizmat qilish uchun yaratilgan. 2006 yilda Livanning “Hizbulloh” harakati va Isroil o‘rtasidagi urushdan so‘ng, BMT Xavfsizlik Kengashi rezolyutsiyasi asosida tinchlikparvar kuchlarning vakolatlari sezilarli darajada kengaytirildi.

Ushbu rezolyutsiyaga ko‘ra, Isroil bilan chegara zonasida faqat UNIFIL va Livan armiyasi qo‘shinlari bo‘lishi kerak. Biroq, shunga qaramay, “Hizbulloh” u yerda bo‘lishda davom etdi. Isroil missiyani o‘z mandatini bajarmaganlikda ayblaydi.