Koronavirusdan uyda davolanayotgan bemorlarga dorilar bepul yetkazib beriladi – Maxsus komissiya qarori

Koronavirusdan uyida davolanayotgan bemorlar bepul dori-darmonlar bilan ta’minlanadi. Bu haqda kecha, 16 iyul kuni O‘zbekiston Bosh vaziri Abdulla Aripov rahbarligida o‘tkazilgan koronavirus pandemiyasiga qarshi kurashish bo‘yicha Respublika maxsus komissiyasi yig‘ilishida qaror qabul qilindi.

Yig‘ilishda 15 iyul kuni O‘zbekiston Prezidenti Shavkat Mirziyoyev rahbarligida Toshkent shahri va Toshkent viloyatida koronavirus pandemiyasi bilan bog‘liq vaziyatga bag‘ishlangan videoselektor yig‘ilishida belgilab berilgan vazifalarni o‘z vaqtida va samarali bajarish masalalari muhokama qilindi. Bu borada mutasaddi vazirlik va idoralarning mas’uliyatini yanada oshirish, rahbarlarning shaxsiy javobgarligini kuchaytirishga alohida e’tibor qaratildi. 

Maxsus komissiya yig‘ilishida koronavirus infeksiyasining odamlar orasida keng tarqalishi oldini olish va ushbu kasallikka chalingan bemorlarga malakali tibbiy xizmat ko‘rsatish bo‘yicha amaliy chora-tadbirlar belgilandi. Jumladan, pandemiya davrida aholiga tibbiy xizmat ko‘rsatish uzluksizligini ta’minlash, koronavirusga tekshiruvlarni tezkor va samarali tashkil etish va bemorlarni kerakli dori-darmonlar bilan ta’minlash bo‘yicha birinchi galda qilinadigan ishlarga e’tibor qaratildi.

Komissiya yig‘ilishida uyida davolanayotgan koronavirus bemorlarini bepul dori-darmonlar bilan ta’minlash yuzasidan qaror qabul qilinib, ularga yetkazib beriladigan dori-darmonlar ruyxati tasdiqlandi.

Bundan buyon koronavirus kasalligidan uyida davolanayotgan bemorlarga “Gidroksixloroxin”, “Azitromitsin”, “Paratsetamol”, “Vitamin S” kabi dori-darmonlar hamda bir martalik tibbiy niqoblarni belgilangan me’yorda, bepul yetkazib berish yo‘lga qo‘yiladi. 

Koronavirus infeksiyasi bo‘yicha test natijalari musbat natija bergan hamda kasallik yengil kechayotganligi sababli shifokorlar tavsiyasiga asosan uyida davolanayotgan bemorlar mazkur tibbiy vositalar bilan bepul ta’minlanadi.

Yig‘ilishda Sog‘liqni saqlash vazirligi hamda tegishli idoralarga zudlik bilan mazkur dori-darmonlarning 50 mingta to‘plamini shakllantirish va uyida davolanayotgan bemorlarga yetkazib berish tizimini yo‘lga qo‘yish vazifasi yuklatildi.