Koreyada nima bo‘ldi, kimlar o‘ldi? Fojianing asosiy tafsilotlari

29 oktyabr kuni Seul markazidagi Itxevon piyodalar ko‘chasida Xellouin bayramini nishonlash vaqtida tiqilinch yuzaga keldi. Unda 150 dan ortiq kishi halok bo‘ldi, 130 dan ortiq kishi jarohat oldi. 

QALAMPIR.UZ ko‘plab odamlarning qurbon bo‘lishiga olib kelgan ushbu voqea haqida asosiy ma’lumotlarni to‘pladi. 

Favqulodda vaziyatlarning sabablari va oqibatlari

Politsiya hisob-kitoblariga ko‘ra, 29 oktyabr kuni barlar, restoranlar va klublar bilan to‘la Itxevon hududida 100 mingga yaqin odam to‘plangan. 

Fojia mahalliy vaqt bilan soat 22:20 atrofida Itxevon metro bekati yaqinida joylashgan “Hamilton” mehmonxonasi yaqinidagi tor piyodalar ko‘chalarida boshlangan. 

OAV xabarlariga ko‘ra, yo‘lakning kengligi taxminan 4 metr va uzunligi 40 metrni tashkil qiladi. 

YTN telekanali tiqilinchga taniqli shaxs barlardan birida ko‘rinish berganini sabab qilib ko‘rsatdi. 

KBS telekanaliga ko‘ra, fojiaga klublardan birida giyohvand moddalar solingan konfet berilgani aytilayotgan odamlarning noo‘rin xatti-harakatlari sabab bo‘lgan. 

Boshqa versiyaga ko‘ra, ikki xil yo‘naltirilgan odamlar oqimining to‘qnashuvi sodir bo‘lgan. 

“Yonhap” axborot agentligining xabar berishicha, tiqilinch vaqtida yaqin atrofdagi muassasalar odamlarni ichkariga kiritmagan. 

Bu voqea Koreya Respublikasida 2014 yilda Sewol paromi cho‘kib ketganidan beri sodir bo‘lgan eng katta fojia bo‘ldi. 

Seul aholisi Itxevon tumanidagi tiqilinch yaqinidagi vaqtinchalik yodgorlik poyiga gul qo‘ydi. 

Fojia qurbonlari

Hodisa oqibatida 150 dan ortiq kishi halok bo‘lgan, 130 dan ortiq kishi jarohatlangan, ulardan kamida 82 nafari shifoxonaga yotqizilgan. 

Halok bo‘lganlar va jarohatlanganlarning katta qismi 18 yoshdan 30 yoshgacha bo‘lgan yoshlardir. 

KBS xabariga ko‘ra, Koreya Respublikasi politsiyasi 153 kishining shaxsini aniqlashga muvaffaq bo‘lgan. 

Seul hukumatiga tiqilinch munosabati bilan bedarak yo‘qolganlar haqida 355 ga yaqin xabar kelib tushgan. 

“Yonhap” axborot agentligi ma’lumotlariga ko‘ra, 14 davlatdan 26 nafar xorijlik tiqilinch qurboni bo‘lgan. Ular orasida bir nafar o‘zbekistonlik ham  bor. Ayollar ko‘pchilikni tashkil qiladi – 154 kishidan 98 tasi. Yana 56 erkak qurbon bo‘lgan. 

Seul qutqaruv xizmatlari vakilining so‘zlariga ko‘ra, 15 nafar xorijlik fuqaro jabrlangan. 

“Yonhap” agentligi Koreya Respublikasi Milliy Mudofaa vazirligidagi manbalariga tayanib, halok bo‘lganlar orasida uch nafar harbiy xizmatchi borligini ma’lum qildi. Ularning yana to‘rt nafar hamkasbi jarohatlangan.
 
“Sinxua” axborot agentligining xabar berishicha, tiqilinchda kamida to‘rt nafar Xitoy fuqarosi halok bo‘lgan. Yana ikki kishi yaralangan. 

Qozog‘iston Tashqi ishlar vazirligida qayd etilganidek, respublika talabasi tiqilinchda halok bo‘ldi. 

“Kyodo” agentligining xabar berishicha, tiqilinch oqibatida kamida ikki yapon fuqarosi halok bo‘lgan. 

Eronning Janubiy Koreyadagi elchixonasi tiqilinchda kamida besh nafar respublika fuqarosi halok bo‘lgani, yana biri yaralangani haqida xabar berdi. 

BFM telekanali Fransiya TIV vakiliga tayanib, tiqilinch oqibatida bir fransuz halok bo‘lgani, yana ikki Fransiya fuqarosi jarohatlangani haqida xabar berdi. 

Tailand Tashqi ishlar vazirligi matbuot kotibi Tani Sangratning aytishicha, tiqilinchda kamida bir nafar Tailand fuqarosi halok bo‘lgan.
 
Rossiyaning Janubiy Koreyadagi elchixonasi hodisa oqibatida to‘rt nafar rossiyalik ayol halok bo‘lganini ma’lum qildi. Bir jabrlanuvchining ahvoli normal deb baholanmoqda. 

Mahalliy vaqt bilan soat 03:00da Janubiy Koreyaning bir necha yuz nafar aholisi va sayyohlar voqeadan keyin Itxevon hududida dam olishni davom ettirgan. 

Mahalliy hokimiyatning munosabati

Voqea joyiga 1700 dan ortiq shifokor va qutqaruvchi hamda 140 ta tez tibbiy yordam va o‘t o‘chirish brigadasi jo‘natildi. 

YTN xabariga ko‘ra, qutqaruvchilar jonlantirish muoolajalarini ko‘chada amalga oshirgan. Qayd etilishicha, 70 ga yaqin odamning o‘limi voqea joyida aniqlangan, qolganlari yo‘lda yoki shifoxonalarda vafot etgan. 

Guvohlarning so‘zlariga ko‘ra, yetib kelgan shifokorlar ko‘p sonli jarohatlanganlarga tibbiy yordam ko‘rsatishga ulgurmagan. Ularga ko‘chadagi odamlar ham yordam bergan. 

Janubiy Koreya Prezidenti Yun Sok Yol va Bosh vazir Xan Doksu tibbiyot xodimlarini jabrlanganlarga zarur yordam ko‘rsatishga chaqirdi. 

Seul meri O Se Xun Yevropaga safarini bekor qilishga qaror qildi. 

Yun Sok Yol mamlakat va Seul ichki ishlar vazirlari, shuningdek, tezkor va qutqaruv xizmatlarining boshqa vakillari ishtirok etgan voqea munosabati bilan favqulodda yig‘ilish o‘tkazdi. 

Janubiy Koreyayetakchisi barcha halok bo‘lganlar va jarohatlanganlarning shaxsini tezda aniqlashga va ularning yaqinlariga xabar berishga chaqirdi, dafn marosimini tashkil etishda yordam berishga va voqeani chuqur o‘rganishga va’da berdi. 

Mamlakatda milliy motam e’lon qilindi. U 5 noyabrgacha davom etadi. 

Hodisa munosabati bilan tashkilotchilar Xellouin bayrami munosabati bilan o‘tkaziladigan festival va paradlarni bekor qila boshladi. 
Shahar hokimiyati odamlar o‘liklarning xotirasini hurmat qilishlari uchun bir nechta qurbongohlar tashkil etishga va’da berishdi. Ulardan biri fojia sodir bo‘lgan joyga o‘rnatiladi. 

Fojia munosabati bilan hukumatdagi Fuqarolik kuchlari partiyasi va asosiy muxolifatdagi Toburo demokratik partiyasi tomonidan favqulodda yig‘ilishlar o‘tkazildi. 

Janubiy Koreya rahbari Seulning bir qismini maxsus ofat hududi deb e’lon qildi. 

Dunyodagi reaksiya

AQSH Prezidenti Jo Bayden qurbonlarning oila a’zolari va yaqinlariga hamdardlik bildirdi. 

AQSH Prezidentining milliy xavfsizlik bo‘yicha yordamchisi Jeyk Sallivanning aytishicha, Vashington fojia munosabati bilan Seulga har qanday zarur yordamni ko‘rsatishga tayyor.

Shuningdek, AQSH Davlat kotibi Entoni Blinken va Vashingtonning boshqa rasmiylari tomonidan hamdardlik va qo‘llab-quvvatlash so‘zlari yo‘llangan. 

Hindiston Tashqi ishlar vaziri Subramanyam Jayshankar Janubiy Koreya bilan birdamlik va qurbonlarning oilalariga hamdardlik bildirdi. 

Yaponiya Bosh vaziri Fumio Kisida Twitter’da Seul markazidagi tiqilinchdan qattiq hayratda va qayg‘uda ekanligini aytdi. 

Germaniya, Buyuk Britaniya, Meksika, Fransiya, Kanada, Avstraliya, Tojikiston, Saudiya Arabistoni, O‘zbekiston va Xitoy rahbarlari ham halokatli tiqilinchga munosabat bildirishgan. 

Yevropa diplomatiyasi rahbari Jozep Borrel sodir bo‘lgan fojia haqida gapirdi. 

Xitoyning Koreya Respublikasidagi elchixonasi halok bo‘lganlar va jarohatlanganlarning oilalariga yordam ko‘rsatishga va’da berdi. 

Rossiya Prezidenti Vladimir Putin tiqilinchda odamlarning halok bo‘lgani munosabati bilan hamdardlik bildirdi.  

Rim papasi Fransisk ham hamdardlik bildirdi. 

Birlashgan Millatlar Tashkiloti Bosh kotibi Antoniu Guterrish Seuldagi fojiada halok bo‘lganlarning oila a’zolariga hamdardlik bildirdi.