Konor Makgregor jinsiy zo‘ravonlikda gumon qilinmoqda

Irlandiyalik sobiq UFC chempioni Konor Makgregor basketbol bo‘yicha “Denver Naggets” va “Mayami Xit” jamoalarining final o‘yiniga kelgan begona ayolga jinsiy zo‘ravonlik qilganlikda ayblanmoqda. Bu haqda “Sports” xabar berdi.

Ma’lum qilinishicha, joriy yilning 13 iyun kuni NBAning final uchrashuvi vaqtida MMA'chi erkaklar hojatxonasida jangni tomosha qilish uchun borgan begona ayolga kuch ishlatish va jinsiy zo‘ravonlik qilishga uringan.

Ayolning advokatiga ko‘ra, uchrashuvni tribunadan turib kuzatayotgan irlandiyalik unga yaqin o‘rindiqda o‘tirgan ayolga (jabrlanuvchi) bir necha bor g‘arazli nigohda qaragan. Musobaqaning tanaffus vaqtida esa sportchining qo‘riqchilari ayolni erkaklar hojatxonasiga majburan olib borgan.

Voqea joyida kutib turgan Makgregor jabrlanuvchiga turli yo‘llar bilan bosim o‘tkazgan hamda ayolni ruhan va jismonan kamsitgan.

Shuningdek, mazkur holat yuzasidan sud-tibbiy ekspertizasi ish boshlagani, tegishli tartibda ishlar olib borilayotgani va daliliy ashyolar to‘planayotgani aytilgan. Ammo sportchining o‘zi ham, vakillari ham yuqoridagilarni uzil-kesil rad etmoqda. 

Ma’lumot uchun, bu Konorning birinchi marta jinsiy zo‘ravonlikda ayblanishi emas. Uning ustidan dastlab 2018 yilda shu turdagi shikoyat arizasi yozilgan. Keyinchalik 2022 yilgacha har yili bir yoki ikki bor MMA'chining ustidan arz bo‘lib turgan. Ularning barchasida dalil yetarli bo‘lmagani uchun Konorning ishi sudga oshirilmagan.

Umurzoqov Muhsinjon