AQSHda ruhoniylar mingga yaqin bolani zo‘rlagani ma’lum bo‘ldi

AQSHning Massachusets shtatidagi uchta katolik yeparxiyasida 275 nafar ruhoniy 944 nafar bolaga jinsiy zo‘ravonlik qilgani aniqlandi. Bu haqda “Reuters” xabar berdi.

Qayd etilishicha, bu holatlar shtat Bosh prokurori Andrea Joy Kempbell boshchiligida o‘tkazilgan tergov doirasida aniqlangan. Tekshiruv Foll-River, Springfild va Vuster yeparxiyalarini qamrab olgan.

Hisobotda qayd etilgan zo‘ravonlik holatlarining aksariyati 2002 yilgacha sodir bo‘lgan. Aynan shu yili “Boston Globe” gazetasi katolik ruhoniylari tomonidan bolalarga nisbatan jinsiy zo‘ravonlik holatlari yashirilgani haqida surishtiruv e’lon qilgan.

Kempbellning aytishicha, uchta yeparxiya rahbariyati ruhoniylar tomonidan bolalarga nisbatan zo‘ravonlik sodir etilayotganidan yillar davomida xabardor bo‘lgan. Uning so‘zlariga ko‘ra, ayrim hollarda cherkov obro‘sini himoya qilish bolalar xavfsizligidan ustun qo‘yilgan.

Tergov 2019 yilda boshlangan. O‘sha paytdagi Bosh prokuror, hozirgi Massachusets gubernatori Maura Xili uchta yeparxiyadagi ruhoniylar faoliyati va rahbariyatning ularni nazorat qilishi bo‘yicha jinoiy tergov boshlagan.

Kempbellning ma’lum qilishicha, tergov davomida uning idorasi ishlarni mahalliy prokurorlarga uch marta yuborgan. Ulardan biri Vuster yeparxiyasidagi holat bo‘yicha ayblov e’lon qilinishiga olib kelgan.

Bosh prokuratura ayrim holatlar sodir etilgan vaqtda qonun bilan jinoyat hisoblanmagani yoki da’vo muddati o‘tib ketgani sababli boshqa ishlar bo‘yicha jinoiy ta’qib boshlamagan.

Kempbell yeparxiyalarda tegishli islohotlarni amalga oshirish hamda bolalikdagi jinsiy zo‘ravonlik qurbonlari uchun fuqarolik da’volariga nisbatan da’vo muddatini bekor qilishni nazarda tutuvchi yangi qonunlar qabul qilishga chaqirgan.

Fall River yepiskopi Edgar da Cunha zo‘ravonlikdan jabrlanganlardan uzr so‘ragan. Springfild yepiskopi Villiam Birne esa hisobotni “kamtarlikka undovchi” deb atab, yeparxiyada yangi siyosat va tartib-taomillar joriy etilganini bildirgan.

Vorcyester yeparxiyasi esa hisobotni o‘rganib, jabrlanganlarga yordam ko‘rsatish va bolalar xavfsizligini ta’minlash bo‘yicha qo‘shimcha choralarni belgilashini ma’lum qilgan.

Eslatib o‘tamiz, avvalroq O‘zbekistonda 4 yilda 14 yoshga to‘lmagan bolalarning nomusiga tegish bo‘yicha 445 ta ish qo‘zg‘atilgani haqida xabar berilgan edi.