KXDR yangi raketa sinovini o‘tkazdi – rasmiy Seul

Shimoliy Koreya yalpi hujum reaktiv tizimidan (YAHRT) snaryadlar uchirdi. Bu haqda kecha, 12 iyun kuni kechqurun Janubiy Koreya armiyasi bosh shtabi ma’lum qildi.

Janubiy Koreya harbiylari uchirilgan raketalar soni va ularning parvoz masofasi haqida ma’lumot bermagan. Seuldagi Prezident ma’muriyati vakilining ta’kidlashicha, Shimoliy Koreya har doim ham raketalari past balandlikda va qisqa masofalarga uchadigan raketa-artilleriya tizimlarining sinovlari haqida darhol xabar bermaydi.

Shu bilan birga, Janubiy Koreya rasmiylari avvalroq KXDRda bunday qurol tizimlarini modernizatsiya qilish ehtimolidan xavotir bildirgan, chunki ular chegaradan atigi 40-50 kilometr uzoqlikda joylashgan Janubiy Koreyadagi yirik shahar aglomeratsiyalari uchun xavf tug‘diradi.

Joriy da’vo qilingan YAHRT sinovi bu yil Shimoliy Koreya tomonidan o‘tkazilgan qurol sinovlarining so‘nggisi bo‘ldi. Mutaxassislar buni Pxenyanning xalqaro sanksiyalarni yumshatish va boshqa imtiyozlarga erishish uchun AQSH va Janubiy Koreyaga bosim o‘tkazishga urinishi sifatida baholamoqda.

Yaqinda Janubiy Koreya va Qo‘shma Shtatlar Shimoliy Koreya so‘nggi besh yil ichida o‘zining birinchi yadroviy sinoviga tayyorgarlikni deyarli yakunlaganini ma’lum qildi. Mart oyida Shimoliy Koreya uzoq masofali raketa sinovlariga 2018 yilgi moratoriyni buzgan holda, AQSH materikiga yetib bora oladigan ballistik raketani uchirdi.