Xorijiy aviakompaniyalar O‘zbekistonga kelayotgan yo‘lovchilar ma’lumotini DXXga beradi

Xalqaro fuqaro aviatsiyasi tashkilotining (IKAO) standartlari va tavsiya etiladigan amaliyotini hisobga olgan holda chegara nazorati tartib-taomillari samaradorligini oshirish va soddalashtirish maqsadida xorijiy mamlakatlar havo kemalarining barcha ekspluatantlari tomonidan yo‘lovchilar bo‘yicha dastlabki ma’lumot taqdim etilishining majburiy tartibi joriy etildi. Bu haqda davlat turizm qo‘mitasi ma’lum qildi.

Bu bo‘yicha Vazirlar Mahkamasining 2020 yil 19 maydagi "O‘zbekiston Respublikasi Davlat xavfsizlik xizmatining Chegara qo‘shinlari bo‘linmalariga xorijiy mamlakatlarning havo kemalari ekspluatantlari tomonidan yo‘lovchilar bo‘yicha dastlabki ma’lumot taqdim etilishi tartibi to‘g‘risidagi nizomni tasdiqlash haqida"gi 293-sonli Qarori qabul qilindi.

Qarorga ko‘ra, 2020 yilning 1 iyul kunidan boshlab O‘zbekiston Respublikasiga parvozlarni amalga oshirayotgan xorijiy mamlakatlar havo kemalarining barcha ekspluatantlari tomonidan yo‘lovchilar to‘g‘risidagi dastlabki ma’lumotlar IKAOning standart formatida Davlat xavfsizlik xizmatining Chegara qo‘shinlariga taqdim etiladi.

Yo‘lovchilar to‘g‘risidagi dastlabki ma’lumotlar bilan ishlash DXX CHQ tomonidan ishlab chiqiladigan tizim bo‘yicha amalga oshiriladi.

Xorijiy mamlakatlar aviatsiya ma’muriyatlari va xorijiy aviatashuvchilar DXX CHQga xalqaro tashuvchilar tomonidan yo‘lovchilar to‘g‘risidagi dastlabki ma’lumot majburiy ravishda taqdim etilishi tizimi amalga kiritilishi to‘g‘risida xabardor qilinadilar.

O‘z navbatida, mazkur tartibning joriy etilishi xorijiy turistlarning mamlakatga kelishlari, bo‘lishlari va respublika hududidan chiqib ketishlarida qo‘shimcha qulayliklar yaratishga xizmat qiladi.

Ma’lumot uchun, IKAO standartlari texnik talab bo‘lib, uning yagona tartibda qo‘llanilishi xalqaro fuqaro aeronavigatsiyasining xavfsizligini yoki muntazamligini ta’minlash uchun zarurdir. IKAO tavsiya etiladigan amaliyoti ham texnik talab bo‘lib, uning yagona tartibda qo‘llanilishi xalqaro fuqaro aeronavigatsiyasining xavfsizligini, muntazamligini yoki samaradorligini ta’minlash uchun maqsadga muvofiq hisoblanadi.