Xitoy kosmik stansiyaga taykonavtlarning yangi ekipajini yubordi (video)

Xitoy mahalliy Tyangun (Samoviy saroy) orbital kosmik stansiyasiga bortida uchta taykonavt bo‘lgan “Shenchjou-19” boshqariladigan kosmik kemasini uchirdi. Bu haqda Xitoy Xalq Respublikasining Kosmik parvozlar dasturi boshqarmasi (CMSA) ma’lum qildi.

Taykonavtlar Say Syuychje, Sun Lindun va Van Xaotsze bo‘lgan “Shenchjou-19” kosmik kemasi Xitoy shimoli-g‘arbidagi Szyutsyuan sun’iy yo‘ldoshini uchirish markazidan “Chanchjen-2F” raketasi yordamida uchirilgan. Ko‘tarilganidan taxminan 10 daqiqa o‘tgach, “Shenchjou-19” kosmik kemasi raketadan ajralib, rejalashtirilgan orbitaga yetib borgan.

Ekipaj kosmik stansiyaga 6,5 soatda yetib borishi kutilmoqda. Taykonavtlarni 25 aprel kuni “Shenchjou-18” kemasida stansiyaga jo‘natilgan va u yerda 6 oy bo‘lgan ekipaj qabul qiladi.

Xitoyning Tyangun kosmik stansiyasining sakkizinchi ekipajiga 2022 yilda “Shenchjou-14” bortida stansiyaga tashrif buyurgan 48 yoshli komandir Say Syuychje boshchilik qilgan. Ekipaj tarkibida 1990 yilda tug‘ilgan va birinchi marta boshqariladigan missiyada ishtirok etgan Sun Lindun va Van Xaotsze ham bor. Ilgari Sun Lindun Xitoy harbiy-havo kuchlarida uchuvchi, Van Xaotsze esa Xitoy aerokosmik fan va texnologiya korporatsiyasida muhandis bo‘lib ishlagan. Van hozirda Xitoydagi yagona bort muhandis va koinotga uchgan uchinchi xitoylik ayol hisoblanadi.

AQSHning kosmik tadqiqotlar bo‘yicha hamkorlikni taqiqlashi va Xitoyning Xalqaro kosmik stansiya dasturidagi ishtirokini cheklashiga javoban Xitoy Yer orbitasida o‘zining Tyangun (Osmon saroyi) kosmik stansiyasini tashkil etdi. Stansiya asosiy modul va ikkita laboratoriya modulidan iborat bo‘lib, kosmik teleskopni ham qo‘shish rejalashtirilgan. U Rossiyaning "Mir" kosmik stansiyasidan keyin modellashtirilgan.

Laboratoriya modullarini asosiy modulga qo‘shgandan so‘ng, T-shaklidagi stansiya loyihasi tugallandi va u "amalga oshirish va ishlab chiqish" bosqichiga o‘tdi. Bundan tashqari, Syuntyan deb nomlangan kosmik teleskopni qo‘shish rejalashtirilgan. Stansiyada uchta taykonavtdan iborat ekipaj navbatma-navbat ishlaydi, xodimlar stansiyaga “Shenchjou” (Muqaddas kema) kemalari orqali yetkaziladi va yuklarni yetkazib berish “Tyanchjou” (Samoviy kema) kemalari orqali amalga oshiriladi.