Хитой космик станцияга тайконавтларнинг янги экипажини юборди (видео)

Хитой маҳаллий Тяньгун (Самовий сарой) орбитал космик станциясига бортида учта тайконавт бўлган “Шэньчжоу-19” бошқариладиган космик кемасини учирди. Бу ҳақда Хитой Халқ Республикасининг Космик парвозлар дастури бошқармаси (CMSA) маълум қилди.

Тайконавтлар Цай Сюйчжэ, Сун Линдун ва Ван Хаоцзэ бўлган “Шэньчжоу-19” космик кемаси Хитой шимоли-ғарбидаги Цзюцюань сунъий йўлдошини учириш марказидан “Чанчжэн-2F” ракетаси ёрдамида учирилган. Кўтарилганидан тахминан 10 дақиқа ўтгач, “Шэньчжоу-19” космик кемаси ракетадан ажралиб, режалаштирилган орбитага етиб борган.

Экипаж космик станцияга 6,5 соатда етиб бориши кутилмоқда. Тайконавтларни 25 апрель куни “Шэньчжоу-18” кемасида станцияга жўнатилган ва у ерда 6 ой бўлган экипаж қабул қилади.

Хитойнинг Тяньгун космик станциясининг саккизинчи экипажига 2022 йилда “Шэньчжоу-14” бортида станцияга ташриф буюрган 48 ёшли командир Цай Сюйчжэ бошчилик қилган. Экипаж таркибида 1990 йилда туғилган ва биринчи марта бошқариладиган миссияда иштирок этган Сун Линдун ва Ван Хаоцзэ ҳам бор. Илгари Сун Линдун Хитой ҳарбий-ҳаво кучларида учувчи, Ван Хаоцзэ эса Хитой аэрокосмик фан ва технология корпорациясида муҳандис бўлиб ишлаган. Ван ҳозирда Хитойдаги ягона борт муҳандис ва коинотга учган учинчи хитойлик аёл ҳисобланади.

АҚШнинг космик тадқиқотлар бўйича ҳамкорликни тақиқлаши ва Хитойнинг Халқаро космик станция дастуридаги иштирокини чеклашига жавобан Хитой Ер орбитасида ўзининг Тяньгун (Осмон саройи) космик станциясини ташкил этди. Станция асосий модул ва иккита лаборатория модулидан иборат бўлиб, космик телескопни ҳам қўшиш режалаштирилган. У Россиянинг "Мир" космик станциясидан кейин моделлаштирилган.

Лаборатория модулларини асосий модулга қўшгандан сўнг, Т-шаклидаги станция лойиҳаси тугалланди ва у "амалга ошириш ва ишлаб чиқиш" босқичига ўтди. Бундан ташқари, Сюньтянь деб номланган космик телескопни қўшиш режалаштирилган. Станцияда учта тайконавтдан иборат экипаж навбатма-навбат ишлайди, ходимлар станцияга “Шэньчжоу” (Муқаддас кема) кемалари орқали етказилади ва юкларни етказиб бериш “Тяньчжоу” (Самовий кема) кемалари орқали амалга оширилади.