Xitoy qush ko‘rinishidagi razvedkachi dronni yaratdi (video)

Xitoy armiyasi qush shaklidagi razvedkachi uchuvchisiz uchish apparatlarini o‘z ichiga olgan texnologik innovatsiya chegaralarini yana bir bor kengaytirdi va qush shaklida parvoz qiluvchi dronni ixtiro qildi. Bu haqda “Army Recognition” xabar berdi.

Uzoqdan tirik qushlardan farq qilib bo‘lmaydigan bu dronlar qanotlarini qoqib, tabiiy ravishda uchib ketadi. Ushbu dronlarning texnik tafsilotlari va o‘ziga xos xususiyatlari sir bo‘lib qolmoqda, ammo ularning dengiz piyoda kuchlari ichida joylashtirilishi tasdiqlangan.

Internetda tarqalgan so‘nggi videoyozuvlarda ushbu dronlardan Xalq ozodlik armiyasi dengiz piyodalari korpusi bo‘linmalaridan biri foydalanayotganini ko‘rish mumkin.

Umuman olganda, Xitoy ornitopterlar sohasida ixtirolar qilayotgan yangi davlat emas. 2018 yildayoq shahar operatsiyalari uchun mimetik dronlarni ishlab chiqishga qaratilgan “Kabutar” nomli hukumat dasturi ishga tushirilgan edi. Xususiyatlari hali oshkor etilmagan bu dronlar shubha uyg‘otmasdan shahar muhitiga joylashtirilishga mo‘ljallangan. 2022 yilda xitoylik muhandislar og‘irligi 1600 gramm bo‘lgan va qanotlarining kengligi ikki metr bo‘lgan ta’sirchan mexanik uchuvchi qushni namoyish qildi. Lityum akkumulyator bilan jihozlangan ushbu dron bir yarim soat davomida havoda qolishi mumkin, bu Xitoyning biomimetik dronlar sohasidagi yutuqlarini namoyish etadi.

Garchi ko‘plab mamlakatlar qushlarga o‘xshash dronlar ustida ishlayotgan bo‘lsa-da, ularning aksariyati pervanellar tomonidan harakatlantiriladigan qattiq qanotli modellar bilan cheklangan. Misol uchun, Gollandiyaning Evolution Eagle kuzatuv uchuvchisiz burguti katta burgut qiyofasida inson ko‘zini faqat uzoq masofadan aldashi mumkin. Bundan farqli o‘laroq, Xitoyning qanotli uchuvchisiz samolyotlari ancha samarali va real kamuflyajni taqdim qiladi.

Eslatib o‘tamiz, avvalroq Massachusets Texnologiya Instituti (MIT) aspiranti Arnav Kapur odamlar va mashinalar o‘rtasida xayolan muloqot qilish imkonini beruvchi ilg‘or texnologiyani ishlab chiqqani xabar qilingandi.