Хитой қуш кўринишидаги разведкачи дронни яратди (видео)

Хитой армияси қуш шаклидаги разведкачи учувчисиз учиш аппаратларини ўз ичига олган технологик инновация чегараларини яна бир бор кенгайтирди ва қуш шаклида парвоз қилувчи дронни ихтиро қилди. Бу ҳақда “Army Recognition” хабар берди.

Узоқдан тирик қушлардан фарқ қилиб бўлмайдиган бу дронлар қанотларини қоқиб, табиий равишда учиб кетади. Ушбу дронларнинг техник тафсилотлари ва ўзига хос хусусиятлари сир бўлиб қолмоқда, аммо уларнинг денгиз пиёда кучлари ичида жойлаштирилиши тасдиқланган.

Интернетда тарқалган сўнгги видеоёзувларда ушбу дронлардан Халқ озодлик армияси денгиз пиёдалари корпуси бўлинмаларидан бири фойдаланаётганини кўриш мумкин.

Умуман олганда, Хитой орнитоптерлар соҳасида ихтиролар қилаётган янги давлат эмас. 2018 йилдаёқ шаҳар операциялари учун миметик дронларни ишлаб чиқишга қаратилган “Кабутар” номли ҳукумат дастури ишга туширилган эди. Хусусиятлари ҳали ошкор этилмаган бу дронлар шубҳа уйғотмасдан шаҳар муҳитига жойлаштирилишга мўлжалланган. 2022 йилда хитойлик муҳандислар оғирлиги 1600 грамм бўлган ва қанотларининг кенглиги икки метр бўлган таъсирчан механик учувчи қушни намойиш қилди. Литюм аккумулятор билан жиҳозланган ушбу дрон бир ярим соат давомида ҳавода қолиши мумкин, бу Хитойнинг биомиметик дронлар соҳасидаги ютуқларини намойиш этади.

Гарчи кўплаб мамлакатлар қушларга ўхшаш дронлар устида ишлаётган бўлса-да, уларнинг аксарияти перванеллар томонидан ҳаракатлантириладиган қаттиқ қанотли моделлар билан чекланган. Мисол учун, Голландиянинг Evolution Eagle кузатув учувчисиз бургути катта бургут қиёфасида инсон кўзини фақат узоқ масофадан алдаши мумкин. Бундан фарқли ўлароқ, Хитойнинг қанотли учувчисиз самолётлари анча самарали ва реал камуфляжни тақдим қилади.

Эслатиб ўтамиз, аввалроқ Массачусетс Технология Институти (МIТ) аспиранти Арнав Капур одамлар ва машиналар ўртасида хаёлан мулоқот қилиш имконини берувчи илғор технологияни ишлаб чиққани хабар қилинганди.