Xakerlar Pentagon saytidan 3 mln xodimning maxfiy ma’lumotlarini o‘g‘irladi

Xakerlar Pentagonning 3 milliondan ortiq amaldagi va sobiq xodimlarining maxfiy ma’lumotlarini o‘g‘irladi. Bu haqda AQSH Mudofaa vazirligi vakillariga tayanib, ABC xabar berdi.

Nashr ma’lumotlariga ko‘ra, juda ko‘p sonli harbiy xizmatchilarning maxfiy ma’lumotlari, jumladan, ijtimoiy sug‘urta raqamlari va ularning lavozimlari haqidagi ma’lumotlar oshkor bo‘lgan. Ushbu ma’lumotlarning miqyosi va xususiyati milliy xavfsizlik nuqtai nazaridan xavotir uyg‘otishi mumkin.

Xabar qilinishicha, 2025 yilning oktyabr oyidan 2026 yilning iyul oyiga qadar bo‘lgan davrda oz sonli vakolatsiz foydalanuvchilar shaxsiy ma’lumotlarga noqonuniy kirish imkoniga ega bo‘lgan. Muammo aniqlangach, Mudofaa vazirligining Mudofaa kadrlar ma’lumotlar markazi (DMDC) zudlik bilan zaiflikni bartaraf etgan.

Xakerlik hujumi haqida o‘tgan haftada birinchi bo‘lib “Military Times” nashri xabar bergan. Pentagon vakillarining bildirishicha, ayni paytda oshkor qilingan ma’lumotlardan jinoiy yoki boshqa maqsadlarda foydalanilganiga oid hech qanday dalil aniqlanmagan. Hozirda jabrlanuvchilarga shaxsni himoya qilish va kredit tarixini monitoring qilish xizmatlari taklif etilmoqda.

Nashr manbalarining xabar berishicha, noma’lum shaxs Federal qidiruv byurosi (FQB) xodimlarining ism-shariflari, ularning uy manzillari, shaxsiy va ishchi aloqa ma’lumotlari, ijtimoiy sug‘urta raqamlari, tug‘ilgan sanalari va favqulodda vaziyatlarda bog‘lanish uchun kontakt ma’lumotlarini o‘z ichiga olgan ma’lumotlarni e’lon qilishini aytgan. Manbalarga ko‘ra, byuro har bir FQB xodimining shaxsiy ma’lumotlari xavf ostida qolgan bo‘lishi mumkinligi haqidagi taxminga tayanib harakat qilmoqda. 

FQB ehtimoliy jabrlangan xodimlarni ogohlantirib, ularni hushyorlikni saqlashga va shubhali qo‘ng‘iroqlarga javob bermaslikka chaqirgan. Jabrlangan xodimlar uchun ichki yo‘riqnomalar ham o‘tkaziladi. 

Eslatib o‘tamiz, avvalroq Isroil 2026 yilning birinchi yarmida e’lon qilingan xakerlik DDoS-hujumlari soni bo‘yicha dunyoda eng ko‘p hujumga uchragan mamlakatga aylangani haqida xabar berilgan edi.