Kanada Bosh vaziri hayotini o‘zgartiradigan “otameros” qaror qabul qildi

Kanada Bosh vaziri Jastin Tryudo va uning rafiqasi Sofi 18 yillik nikohdan so‘ng ajrashishlarini ma’lum qildi. Bu haqda hukumat rahbari o‘zining Instagram sahifasida yozgan.

“Er-xotin uzoq muhokamalardan so‘ng, ajralishga qaror qildik. Har doimgidek, biz bir-birimizga hamda biz qurgan va qurishda davom etadigan barcha narsalarga chuqur muhabbat va hurmat bilan yaqin bo‘lib qolamiz”, deyiladi postda.

Tryudo idorasi bayonotida aytilishicha, ajrashish to‘g‘risidagi bitim imzolanganiga qaramay, sobiq turmush o‘rtoqlar ommaviy tadbirlarda birga chiqadi.

Jastin va Sofi Tryudo 2005 yilda turmush qurgan. O‘n yil o‘tgach, Tryudo Kanada Bosh vaziri bo‘ldi. Ularning uchta farzandi bor: 15 yoshli o‘g‘li Ksaver, 14 yoshli qizi Ella-Jeyms va to‘qqiz yoshli o‘g‘li Adrian. Ikkalasi 2003 yilda, Sofi Tryudo xonim teledasturda ishlayotgan paytda uchrasha boshlagan. U ruhiy salomatlik va ovqatlanish buzilishi bilan bog‘liq xayriya ishlari bilan mashhur.

“Reuters” agentligiga ko‘ra, Tryudoning ajrashishi og‘riqli tarixiy o‘xshashliklarga ega. Jastinning otasi Per Tryudo ham 1977 yilda Kanada Bosh vaziri bo‘lganida rafiqasi Margaret bilan ajrashgan. Jastin Tryudo o‘shanda olti yoshda edi.