Kamilla Rahimova Mayami turnirini muvaffaqiyatli boshladi

Kecha, 16 mart kuni AQSHning Mayami shahrida WTA 1000 toifasiga kiruvchi “Miami Open” turniri start oldi. Musobaqaning saralash bosqichi dastlabki bahsida Kamilla Rahimova g‘alaba qozondi.

Umumiy mukofot jamg‘armasi 9 mln 415 ming 725 dollarni tashkil etadigan turnirning saralash bahslarida O‘zbekistonning birinchi va ikkinchi raketkalari – Kamilla Rahimova hamda Mariya Timofeyeva ham kortga chiqdi. 

Kamilla Rahimova dastlabki saralash bahsida fransiyalik Leoliya Janjanga qarshi kortga chiqdi. Birinchi setni tay-brekda boy bergan Rahimova keyingi ikki setda qaytish amalga oshirib 6/7(1), 7/5, 6/0 hisobida g‘alaba qozondi. 

Mariya Timofeyeva esa saralashning dastlabki uchrashuvida avstraliyalik Lulu Sunga 4/6, 6/7(5) hisobida imkoniyatni boy berdi va musobaqadagi ishtirokini yakunladi.

Endi bugun, 17 mart kuni Rahimova turnirning asosiy bosqichiga yo‘llanma beruvchi bahsida dunyoning 68-raketkasi, avstraliyalik Talia Gibsonga qarshi kortga chiqadi.