Kam ta’minlanganlarga yordam berish tartibi soddalashtirildi

Endilikda “Temir daftar”ga kiritilgan oilalarga bir martalik moddiy yordam bir ish kunida tuman (shahar) hokimlari qarorlari bilan beriladi.

Vazirlar Mahkamasi tomonidan joriy yilning 17 oktyabr kuni qabul qilingan 547-sonli qarori bilan Hukumatning ayrim hujjatlariga ijtimoiy ahvoli va turmush sharoiti og‘ir oilalarni qo‘llab-quvvatlash tizimini soddalashtirishga qaratilgan o‘zgartirish va qo‘shimchalar kiritildi.

Ma’lum qilinishicha, ushbu hujjat “Temir daftar”ga kiritilgan ijtimoiy ahvoli og‘ir oilalarning muammolarini tizimli ravishda tezkor hal etish bo‘yicha samarali chora-tadbirlarni belgilash zarurati munosabati bilan qabul qilingan.

"Xalq deputatlari tuman (shahar) Kengashlarining sessiyalari oralig‘idagi davrda kechiktirib bo‘lmaydigan hollarda, zudlik bilan yordam ko‘rsatish zaruriyati yuzaga kelganda – “Temir daftar”ga kiritilgan oilalarga bir martalik moddiy yordam bir ish kunida tuman (shahar) hokimlari qarori bilan beriladi", deyiladi kam ta’minlanganlarni ijtimoiy qo‘llab-quvvatlash bo‘yicha vaqtinchalik tartibda.

Ma’lum qilinishicha, mazkur hujjat joriy yilning 20 oktyabridan kuchga kirgan.