Qozog‘istondan mol go‘shti olib chiqishga cheklov o‘rnatildi

Qozog‘iston Qishloq xo‘jaligi vaziri yirik shoxli qoramol go‘shtini mamlakatdan olib chiqishni olti oy muddatga cheklash to‘g‘risidagi buyruqni imzoladi. Bu haqda hujjatga tayanib, “Nur.kz” xabar beradi.

Hujjatga ko‘ra, yangi, sovutilgan va muzlatilgan holdagi yirik shoxli qoramol go‘shtining har qanday turi bo‘yicha uchinchi davlatlarga hamda Yevroosiyo iqtisodiy ittifoqi mamlakatlariga eksport qilish uchun miqdoriy cheklovlar (kvotalar) joriy etiladi. Umumiy kvota hajmi 20 ming tonnani tashkil etadi.

Mamlakat Qishloq xo‘jaligi vazirligining Veterinariya nazorati va nazorat qo‘mitasi hamda Davlat daromadlari qo‘mitasiga buyruq ijrosini ta’minlash bo‘yicha zarur choralarni ko‘rish topshirilgan.

Hujjatga ilovada kvotalarni taqsimlash qoidalari keltirilgan. Xususan, e’lon gov.kz davlat portalida joylashtirilishi lozim bo‘lib, unda quyidagilar ko‘rsatiladi:

• yirik shoxli qoramol go‘shtini olib chiqish uchun ajratilgan kvota hajmi;
• har bir eksportyor uchun yirik shoxli qoramol go‘shtini olib chiqish kvotasi miqdori.

Bir shaxs uchun kvota miqdori ozuqa maydonchasining quvvatiga qarab quyidagicha belgilanadi:

bo‘rdoqilash maydonchasi quvvati 5 000 boshdan boshlab – 1 000 tonna;

• 10 000 boshdan – 2 000 tonna;
• 15 000 boshdan – 3 000 tonna;
• 20 000 boshdan – 4 000 tonna;
• 50 000 boshdan – 10 000 tonna.

Kvota berilgan kundan boshlab 10 kalendar kun davomida amal qiladi. Mol go‘shtini eksport qilish bo‘yicha kvotalar miqdorini taqsimlash ayrim turdagi tovarlarni eksport qilish uchun litsenziya berish jarayonida portal orqali avtomatik tarzda amalga oshiriladi.

Ushbu cheklovlarning asosiy maqsadi mamlakatning oziq-ovqat xavfsizligini ta’minlash, chorvachilik mahsulotlarini qayta ishlashni rivojlantirish hamda mol go‘shti narxlarini barqarorlashtirish ekani aytilmoqda.

Eslatib o‘tamiz, avvalroq Qozog‘istonning “Zhabyak LLP” va Yaponiyaning “Senko Farm” kompaniyasi otlar va ot go‘shti mahsulotlari eksportini rivojlantirishga qaratilgan hamkorlik memorandumini imzolagandi.