Qozog‘iston Rossiya portlari orqali Yevropaga ko‘mir yetkazib beradigan bo‘ldi

Qozog‘iston hukumati Qozog‘iston ko‘mirining Yevropa Ittifoqiga tranziti bo‘yicha Rossiya portlari bilan operatsiyalarni taqiqdan ozod qilish bo‘yicha kelishuvga erishdi. Bu haqda Qozog‘iston Savdo va integratsiya vazirligi matbuot xizmati xabar berdi.

“2025 yilning fevralida Yevropa Ittifoqining 16-sanksiya paketi doirasida Rossiyaning bir qator portlari bilan har qanday tranzaksiyalarni taqiqlash joriy etildi. Bu Qozog‘iston ko‘mirining Yevropa mamlakatlariga eksporti barqarorligiga tahdid tug‘dirdi. Masalan, Ust-Luga porti tarixan Qozog‘iston ko‘mirining Yevropaga asosiy tranzit punkti sifatida foydalanilgan”, deyiladi vazirlik xabarida.

Bu masalani hal qilish maqsadida Qozog‘iston hukumati vakillari Yevropa tomoni bilan muzokaralar o‘tkazdi. Yevrokomissiyaga sanksiyalar rejimiga tegishli o‘zgartirishlar kiritish uchun rasmiy so‘rov yuborildi.

“18-sanksiya paketi doirasida bo‘lib o‘tgan muzokaralar yakunlariga ko‘ra, Yevropa tomoni Qozog‘iston ko‘mirining tranziti bo‘yicha Rossiyaning ayrim portlari bilan operatsiyalarni taqiqlashdan ozod qilishni nazarda tutuvchi o‘zgartirishlar kiritdi”, deya tushuntirdi matbuot xizmati.

Shu bilan birga, ko‘mir faqat Qozog‘istondan olinishi kerak. Yukga egalik huquqi cheklovchi choralar qo‘llaniladigan mamlakatlarning norezidentlariga tegishli bo‘lishi kerak, portlardan faqat tranzit, yuklash yoki jo‘natish hududi sifatida foydalanish mumkin.

Vazirlik ma’lumotlariga ko‘ra, ko‘rilayotgan chora-tadbirlar Qozog‘iston ko‘mirining Yevropa Ittifoqiga yetkazib berilishi tiklanishiga, shuningdek, logistika yo‘nalishlarining barqarorligini mustahkamlashga umid qilish imkonini beradi.

2024 yilda Qozog‘istonning Yevropa Ittifoqiga ko‘mir eksporti hajmi 5,2 million tonnani yoki umumiy ko‘mir eksportining 51,8 foizini tashkil etdi. 2025 yilning yanvar-may oylarida eksport 1,6 million tonnani yoki umumiy ko‘mir eksportining 38,5 foizini tashkil etdi.