Qozog‘iston fuqarolarini Isroil, Eron va Livandan evakuatsiya qilishni ko‘rib chiqmoqda

Yaqin Sharqdagi og‘ir siyosiy vaziyatdan kelib chiqqan holda Qozog‘iston Respublikasi Isroil, Eron va Livandagi fuqarolarini evakuatsiya qilishi mumkin. Bu haqda Qozog‘iston Tashqi ishlar vazirligi rasmiy vakili Aybek Smadiyarov favqulodda brifingda ma’lum qildi.

“Qozog‘istonning Isroil, Eron va Livandagi elchixonalari ushbu davlatlarning vakolatli organlari bilan doimiy aloqada. Hozircha Qozog‘iston Respublikasi fuqarolari jabrlanganlar yoki halok bo‘lganlar haqida hech qanday ma’lumot yo‘q”, dedi Smadiyarov.

U barcha fuqarolar konsullik ro‘yxatidan o‘tmasligiga e’tibor qaratdi. Shu sababli, aloqa o‘rnatish va ro‘yxatlarni tuzish vaqt talab etadi.

“Oxirgi bir necha oy ichida Yaqin Sharqdagi vaziyat sezilarli darajada yomonlashdi, bu borada Isroil, Eron va Livandagi qozoq diplomatlari intensiv rejimda ishlamoqda. Konsullikda ro‘yxatga olingan fuqarolar ro‘yxati doimiy ravishda yangilanadi. Shunday qilib, bugungi kunda Qozog‘istonning 120 nafar fuqarosi, jumladan diplomatlar va ularning oila a’zolari Isroilda, 180 nafari Eronda, 143 nafari Livanda konsullik ro‘yxatida”, — dedi Smadiyarov  favqulodda brifing chog‘ida.

Shuningdek, u Qozog‘iston Tashqi ishlar vazirligi va Isroil, Eron va Livandagi xorijiy vakolatxonalarida ishonch telefonlari ochilganini, ular haqidagi ma’lumotlar brifingdan so‘ng darhol rasmiy manbalar va ijtimoiy tarmoqlarda e’lon qilinishini qo‘shimcha qildi.

Bundan tashqari, TIV qozog‘istonliklarga zarur yordamni tashkil etish ishlarini muvofiqlashtiruvchi tezkor shtab tuzdi.

“Vazirlik vakolatli organlar bilan birgalikda repatriatsiya reyslarining rivojlanishi mumkin bo‘lgan vaziyatni nazorat qilmoqda. Isroil xalqaro ayeroporti odatdagidek ishlamoqda; Erondagi barcha reyslar 3 oktyabr kuni ertalabgacha bekor qilindi. Bundan tashqari, 1 oktyabrgacha Livandagi yuzdan ortiq xorijiy elchixonalardan birortasi ham o‘z fuqarolarini evakuatsiya qilmagan. Livan rasmiylarining o‘zlari tomonidan bu borada tegishli ko‘rsatma yo‘q. Shu bois fuqarolarimizni evakuatsiya qilish masalasi hamon o‘rganilmoqda va Tashqi ishlar vazirligining alohida nazorati ostida”, deb ishontirdi boshqarma rasmiy vakili.

Shu bilan birga, murakkab harbiy-siyosiy vaziyat tufayli, shuningdek, Qozog‘iston fuqarolarining xavfsizligini ta’minlash maqsadida vazirlik Referendum o‘tkazish bo‘yicha Markaziy komissiya bilan birgalikda Isroil, Eron va boshqa davlatlarda referendum o‘tkazuvchi ob’ektlar ishini vaqtincha to‘xtatib turishga qaror qildi.

Umuman olganda, Smadiyarov Yaqin Sharqdagi vaziyatni sharhlar ekan, mintaqada keng ko‘lamli urushni keltirib chiqarishi mumkin bo‘lgan tinch aholi qurbonlari va vaziyatning yanada yomonlashuviga yo‘l qo‘ymaslik uchun barcha ishtirokchi tomonlarni kuch ishlatish usullaridan voz kechishga chaqirdi.

Eslatib o‘tamiz, avvalroq Yaqin Sharqdagi harbiy vaziyat keskinlashgani sababli Qozog‘iston aviakompaniyalariga Eron havo hududi orqali parvoz qilmaslik tavsiya qilingandi.

Muhammad Hodiyev