Qozog‘iston aholisi 20 milliondan oshdi

2024 yilning yanvar-avgust oylarida Qozog‘iston aholisi 168 ming kishiga yoki 0,84 foizga o‘sib, 1 sentyabr holatiga ko‘ra, 20 million 201,8 ming kishiga yetdi. Bu haqda Qozog‘iston Milliy statistika byurosi xabar berdi.

Aholi sonining o‘sishi hali ham birinchi navbatda megapolislar va mamlakatning g‘arbiy hududlari hisobiga ta’minlanmoqda. Shu tariqa, Ostona aholi o‘sishi bo‘yicha mutlaq yetakchi bo‘lib qolmoqda – ham tabiiy o‘sishning yuqoriligi, ham mamlakatdagi eng yuqori ichki migratsiya tufayli. Joriy yilning sakkiz oyida Ostona aholisi 4,24 foizga o‘sdi.

Ostonadan keyin aholi sonining respublika darajasidan yuqori o‘sish sur’atlari faqat to‘rtta viloyatda – Olmaota (1,89 foiz), Chimkent (1,79 foiz), Mang‘istau (1,57 foiz) va Olmaota viloyatida (1,12 foiz) kuzatilmoqda. Yana sakkizta mintaqada aholi soni mamlakat o‘rtacha ko‘rsatkichidan sekinroq o‘smoqda.

Qozog‘istonning yetti viloyatida aholining qisqarishi davom etdi: Shimoliy Qozog‘iston, Qo‘stanay, Pavlodar, Sharqiy Qozog‘iston, Qarag‘anda viloyatlari, shuningdek, Abay va Jetisu viloyatlarida. Yanvar-avgust oylarida aholi eng ko‘p Shimoliy Qozog‘istonda – 1,02 foizga, shuningdek, Abay viloyatida – 0,42 foizga kamaydi.

Umuman Qozog‘iston bo‘yicha migratsiya ijobiy bo‘lib qoldi, mintaqaviy miqyosda esa faqat beshta hududda – uchta megapolisda, shuningdek, Olmaota va Mang‘istau viloyatlarida migratsiya ijobiy ko‘rsatkichda.

Qozog‘istonda 2024 yilning yanvar-avgust oylarida shahar aholisi 1,38 foizga oshib, 12 ming 681,1 kishiga yetdi. Qishloq aholisi bu davrda 0,07 foizga kamayib, 7 ming 520,8 kishini tashkil etdi. Mamlakatda shahar aholisining ulushi 62,8 foizga yetdi, qishloq aholisi esa 37,2 foizga qisqardi.

Eslatib o‘tamiz, avvalroq Qozog‘iston Prezidenti Qosim-Jomart To‘qayev mamlakat aholisi 20 million kishiga yetganini e’lon qilgandi. To‘qayevning ma’lum qilishicha, 2023 yilning 16 noyabr kuni 20 millioninchi qozog‘istonlik tug‘ilgan. Qozog‘istonning 20 millioninchi fuqarosi bo‘lgan chaqaloqning oilasiga 2 million tenge (4 ming 313 dollar)lik sertifikat topshirilgan.

Mazkur mablag‘ Otbasy Bank tomonidan taqdim etilgan bo‘lib, bank rahbariyati ushbu tarixiy voqeaga hissa qo‘shgan oilaga “suyunchi puli” ajratishga qaror qilgan. Ya’ni bank tomonidan yangi tug‘ilgan farzandi mamlakatning 20 millioninchi aholisiga aylangan besh kishilik qozoq oilasiga 2 million tengelik sertifikatlar berilgan.