Qoraqalpog‘istondagi mudhish YTHda 2 kishi vafot etdi

Qoraqalpog‘iston Respublikasida Lacetti va Labo rusumli avtomashinalar to‘qnashishi oqibatida ikki kishi halok bo‘ldi. Bu haqda Respublika Ichki ishlar vazirligi Matbuot xizmati xabar berdi.

Keltirilishicha, voqea kecha, 12 iyun kuni soat 14:30 da 4R-176-sonli “Nukus-Chimboy-Taxtako‘pir” avtomobil yo‘lining 43-44 km oralig‘ida yuz bergan. Fuqaro B.M. boshqaruvidagi Lacetti rusumli transport vositasi yo‘lning qarama-qarshi yo‘nalishiga chiqib ketib, fuqaro R.T. boshqaruvidagi Labo avtomobili bilan to‘qnashgan.

YTH oqibatida Labo haydovchisi R.T. hamda Lacetti avtomashinasida bo‘lgan yo‘lovchi voqea joyida vafot etgan. Lacetti avtomashinasi haydovchisi B.M. va ushbu avtomashina yo‘lovchisi va voyaga yetmagan A.B.lar tan jarohatlar olib Kegayli tumani tibbiyot birlashmasiga yotqizilgan.

Mazkur holat yuzasidan Qoraqalpog‘iston Respublikasi Ichki ishlar vazirligi huzuridagi Tergov boshqarmasi tomonidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilib, dastlabki tergov harakatlariga kirishilgan.