Qonli yanvar voqealari uchun sud qilinayotgan sobiq politsiya rahbari Qozog‘istondan noqonuniy qochib ketdi

north_east

Nazarboyev saltanatiga yakun yoxud “qonli yanvar”dan qolgan dog‘lar

Olmaota viloyati politsiyasining sobiq rahbari Serik Kudebayev Bishkek orqali Istanbulga qochib ketdi. Qirg‘iziston chegarani noqonuniy kesib o‘tish bo‘yicha unga nisbatan jinoiy ish qo‘zg‘atdi. Bu haqda Qozog‘iston bosh prokurori o‘rinbosari Jandos Umiraliyev parlament majilisi chog‘ida ma’lum qildi.

“Davlat chegarasini noqonuniy kesib o‘tish fakti bo‘yicha jinoyat ishi qo‘zg‘atildi. Ishning muhimligini inobatga olib, Bosh prokuratura o‘z zimmasiga oldi. Eng tajribali xodimlar qidiruvga jalb qilingan. Qirg‘izistonga so‘rov yubordik, endi birgalikda qidiruv tadbirlarini o‘tkazamiz. Qirg‘izistonlik hamkasblarimizga ko‘ra, Kudebayev ularning manziliga yetib kelgan va “Manas” aeroporti orqali Istanbulga uchgan. Ular hozir bu ma’lumotni bermoqda. Turkiya bilan kelishuvimiz bor, hozir ular bilan ishlayapmiz. Biz barcha ma’lumotlarni taqdim eta olmaymiz, chunki shaxs qochqinda, bu tergovga zarar yetkazishi mumkin”, dedi u jurnalistlarga.

Umiraliyevning so‘zlariga ko‘ra, Qirg‘izistonda ham davlat chegarasini noqonuniy kesib o‘tish bo‘yicha jinoiy ish qo‘zg‘atilgan.

Joriy yilning 3 aprel kuni Serik Kudebayev o‘z ishi bo‘yicha sud majlisiga kelmagan va sudya general-mayor Qozog‘istonning Qirg‘iziston bilan davlat chegarasini kesib o‘tganini va shu kuni Bishkekdan Istanbulga uchib ketganini aytgan. Ayblanuvchi xalqaro qidiruvga berilgan.

Qozog‘iston Respublikasi Milliy xavfsizlik qo‘mitasi chegara xizmati Serik Kudebayev Qozog‘iston davlat chegarasini rasman faoliyat yuritayotgan o‘tkazish punktlari orqali kesib o‘tmaganini ma’lum qilgan.

58 yoshli Serik Kudebayev mansab vakolatini suiiste’mol qilishda ayblanmoqda. Tergov ma’lumotlariga ko‘ra, 2022 yil yanvardagi tartibsizliklar paytida u Olmaota viloyati komendanti sifatida politsiya bo‘limi binosini tark etgan. Oqibatda qo‘zg‘olonchilar u yerdan qurol o‘g‘irlab ketgan.