Qirg‘iziston chet el fuqarolari uchun chegaralarni ochmoqchi

Qirg‘izistonda chet el fuqarolarini qabul qilishni bosqichma-bosqich qayta tiklash to‘g‘risida Hukumat qarori qabul qilindi. Ayrim toifadagi chet elliklar va fuqaroligi bo‘lmagan shaxslar uchun Qirg‘izistonga kirish hozirdan soddalashtirildi. Bu haqda Sputnik Qirg‘iziston xabar bermoqda. 

Joriy etilgan o‘zgarishlarga ko‘ra, Qirg‘izistonga quyidagi toifaga mansub fuqarolar va fuqaroligi bo‘lmagan shaxslar kirishlari mumkin:

•    xorijiy davlatlar fuqarolari va Qirg‘iziston Respublikasi universitetlarida tahsil olayotgan fuqaroligi bo‘lmagan shaxslar (o‘qish joyidan ma’lumotnoma asosida);

•    Qirg‘iziston Respublikasida doimiy yashash huquqiga ega bo‘lgan xorijiy davlatlar fuqarolari va fuqaroligi bo‘lmagan shaxslar;

•    Qirg‘iziston Respublikasi hududidagi tibbiy muassasalarga davolanish uchun yo‘l olgan xorijiy davlatlarning fuqarolari va fuqaroligi bo‘lmagan shaxslar (hujjat bilan tasdiqlangan holda);

•    yaqin qarindoshlarning dafn marosimiga boradigan xorijiy davlatlarning fuqarolari va fuqaroligi bo‘lmagan shaxslar (yaqin qarindoshlik aloqalari va o‘lim faktlari hujjatli ravishda tasdiqlanishi shart).

"Bundan tashqari, koronavirus tarqalishi bilan bog‘liq oqibatlarni minimallashtirishga qaratilgan iqtisodiy chora-tadbirlarni amalga oshirish doirasida xorijiy davlatlar fuqarolarini o‘tkazishni bosqichma-bosqich tiklash to‘g‘risida qaror qabul qilindi", deyiladi xabarda. 

Ta’kidlanishicha, epidemiologik vaziyat barqarorlashishiga qarab, Sog‘liqni saqlash vazirligi har oyda ikki marta (birinchi va o‘n beshinchi sanalarda) qayta ko‘rib chiqiladigan tegishli mamlakatlar ro‘yxatini tasdiqlaydi.

Ro‘yxatga kiritilgan chet elliklar qonun hujjatlarida belgilangan tartibda Qirg‘iziston chegarasini kesib o‘tishlari mumkin.

Qirg‘iziston hukumati COVID-19 tarqalishining oldini olish maqsadida joriy yil mart oyida mamlakatga chet ellik fuqarolar va fuqaroligi bo‘lmagan shaxslar kirishiga cheklov o‘rnatgan edi.