Qibrayda ikki avtobusning poyga o‘ynashi YTH bilan tugadi

Kecha, 11 aprel kuni Toshkent viloyatining Qibray shahrida ikki yo‘lovchi avtobusining poyga o‘ynashi yo‘l-transport hodisasi bilan yakunlandi. Bu haqda “Toshshahartransxizmat” AJ matbuot xizmati xabar berdi.

Qayd etilishicha, 11 aprel kuni soat 14:30 atrofida “2-Avtobus saroyi” filiali haydovchisi X.U. Isuzu rusumli, saroy raqami 235 bo‘lgan avtobusni 199-yo‘nalishda Qibray shahri Alisher Navoiy ko‘chasi bo‘ylab boshqarib borayotib, “Makro” do‘koni qarshisida Lacetti rusumli yengil avtomobil bilan to‘qnashuv sodir qilgan. To‘qnashuv natijasida jarohat olganlar yo‘q.

Hozirda, mazkur yo‘l-transport hodisasi Yo‘l harakati xavfsizligi boshqarmasi xodimlari tomonidan rasmiylashtirilgan. Shuningdek, ushbu yo‘l-transport hodisasi yuzasidan xizmat surishtiruvi o‘tkazilganda, haydovchi X.U. “2-Avtobus saroyi” filiali haydovchisi A.F boshqaruvidagi Isuzu rusumli saroy raqami 245-bo‘lgan 198-sonli avtobus yo‘nalishi bilan o‘zaro poyga o‘ynagani aniqlangan.

Yo‘lovchilar va boshqa yo‘l harakati ishtirokchilari hayotini xavf ostiga qo‘ygani hamda yo‘l harakati qoidalariga rioya etmagani natijasida yo‘l-transport hodisasi sodir etgani uchun har ikki haydovchi bilan filial o‘rtasida tuzilgan mehnat shartnomalari bekor qilingan. Avtobusga yetkazilgan zarar aybdor haydovchi tomonidan o‘rnatilgan tartibda undiriladi.