Qashqadaryodagi YTHda ikki kishi vafot etdi

Qashqadaryoda Nexia-3 va Nexia-2 avtomobillari o‘zaro to‘qnashishi oqibatida ikki kishi halok bo‘ldi, yana ikki kishi shifoxonaga yotqizildi. Bu haqda viloyati IIB Matbuot xizmati xabar berdi.

Unga ko‘ra, hodisa kecha, 5 may kuni soat taxminan 13:30 larda davlat ahamiyatidagi 4R-79 “Qarshi-Chim-Chiroqchi-Shahrisabz” avtomobil yo‘lida sodir bo‘lgan. Fuqaro B.M. boshqaruvida bo‘lgan Nexia-3 rusumli avtomobil “Shahrisabz-Qarshi” yo‘nalishi bo‘yicha harakatlanayotib, qarama-qarshi tomondan kelayotgan J.A. boshqaruvidagi Nexia-2 bilan to‘qnashib, YTH sodir etgan.

Oqibatda, Nexia-2 rusumli avtomashinada bo‘lgan ikki nafar yo‘lovchi tan jarohati olib, hodisa joyida vafot etgan. Har ikkala transport vositasi haydovchilari tan jarohati olib shifoxonaga yotqizilgan.

Hozirda mazkur holat yuzasidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilgan.

Nurmuhammad Fayzullayev