Qashqadaryoda prokuratura tergovchisi 5 ming dollar pora bilan ushlandi

Qarshi tumani prokuraturasi tergovchisi 5 ming AQSH dollari miqdoridagi pora bilan qo‘lga tushdi. Bu haqda Davlat xavfsizlik xizmati axborot xizmati xabar berdi. 

Qayd etilishicha, Qashqadaryo viloyatining Mirishkor tumanida yashovchi, 1983 yilda tug‘ilgan fuqaro naslli chorvani rivojlantirish maqsadida, Qarshi tumanida istiqomat qiluvchi qarindoshi rahbarlik qilayotgan MCHJ nomiga 2021 yilning mart oyida aksiyadorlik tijorat bankidan 450 mln so‘m miqdorida imtiyozli kredit olgan.

Imtiyozli kredit maqsadli yo‘naltirilmaganligi sababli, Iqtisodiy jinoyatlarga qarshi kurashish departamentining Qarshi tumani bo‘limi tomonidan JKning 167-moddasi bilan jinoyat ishi qo‘zg‘atilib, dastlabki tergov harakatlari olib borish uchun Qarshi tumani prokuraturasiga yuborilgan.

Tuman prokuraturasi tergovchisi ish yurituviga berilgan ushbu jinoyat ishi doirasida, joriy yilning 26 mart kuni kredit olgan shaxsga nisbatan qamoqqa olish tarzidagi ehtiyot chorasi qo‘llanilgan. Bundan tashqari, tergovchi o‘z xizmat mavqeidan foydalanib, kredit ajratilgan MCHJ rahbari bo‘lgan ayolga nisbatan qamoq ehtiyot chorasi qo‘llamaslik evaziga, tamagirlik yo‘li bilan undan 5 ming AQSH dollari miqdorida pora talab qilgan.

Davlat xavfsizlik xizmati xodimlari tomonidan o‘tkazilgan tezkor tadbirda, tergovchi so‘ralgan pul mablag‘ini o‘zining xizmat xonasida olgan vaqtida ashyoviy dalillar bilan ushlangan.

Hozirda Qarshi tumani prokuraturasi tergovchisiga nisbatan Jinoyat Kodeksining 210-moddasi 2-qismi "v" bandi (pora olish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgani aytilmoqda.