Qashqadaryoda buyum bozoridagi do‘konlar yondi
3-sahifa
−
17 aprel 2023 9309
Qashqadaryo viloyati Chiroqchi tumanida buyum bozori yonidagi do‘konlarda yong‘in sodir bo‘ldi. Bu haqda viloyat Favqulodda vaziyatlar boshqarmasi xabar berdi.
Aniqlanishicha, bugun 17 aprel kuni tongi soat 00:33 larda Chiroqchi tumani FVB ga “Chiroqchi” mahallasida joylashgan “Sarbon Barakasi” MCHJ buyum bozori yonida yong‘in sodir bo‘layotganligi to‘g‘risida xabar kelib tushgan.
Chaqiruvga ko‘ra, tuman FVB dan 3 ta yong‘in-qutqaruv bo‘linmasi voqea joyiga 00:36 larda yetib borgan va yong‘in to‘liq 01:20 da o‘chirilgan.
Yong‘in oqibatida yakka tartibdagi tadbirkorlarga tegishli 2 ta savdo do‘konlarining jami 60 kvadrat metr maydonda ichki va tom qismi yongan. Shuningdek, do‘konlardagi savdo mollari ham zararlangan.
Yong‘indan savdo do‘konlariga yondosh bo‘lgan 20 tadan ortiq do‘kon asrab qolingan.
Yong‘indan tan jarohati olganlar yo‘q, hozirda yong‘in sabablari va zararlari aniqlanayotgani aytilgan.
