Qanday qilib firibgarlar plastik kartangizdan pul yechib olishi ma’lum qilindi

O‘zbekiston Markaziy banki firibgarlar qanday qilib masofadan turib plastik kartalardan pul yechib olishini va buni qanday oldini olish kerakligini ma’lum qildi. Tegishli ma’lumot kecha, 19 may kuni bankning Telegram kanalida e’lon qilindi.

Ta’kidlanishicha, bank kartasi ustidagi raqamlari, ya’ni rekvizitlar – karta egasini unifikatsiya va identifikatsiya qilish hamda kartaning amal qilish muddatini belgilaydi. Shuningdek, rekvizitlar bank kartasini masofaviy xizmat ko‘rsatish tizimiga ulash uchun foydalaniladi.

“Bank kartasidagi raqamlar boshqa shaxsga oshkor bo‘lib qolishi xavf tug‘dirmaydi. Ammo begona shaxslar tomonidan karta egasining ruxsatisiz masofaviy xizmat ko‘rsatish tizimiga ulanish uchun karta rekvizitlari kiritilganda, karta egasining uyali telefoniga SMS-xabarnoma xizmati orqali maxfiy kod yoki raqamli xabarnoma keladi. Agar mazkur xabar (kod) begona shaxsga oshkor bo‘lsa, ularda masofadan turib kartadagi mablag‘ni o‘zlashtirish imkoni tug‘iladi. Ya’ni karta egasi mablag‘ini firibgarlarga o‘zlashtirish uchun sharoit yaratib bergan bo‘ladi.

Misol uchun, firibgar o‘zini bank xodimi yoki turli aksiyalar tashkilotchisi sifatida telefonda tanishtirib, kartaga ma’lum miqdorda mablag‘ o‘tkazib berishni taklif qilgan holda, bank kartasi egasining mobil telefoniga kelgan “tasdiqlovchi kod”ni so‘rashi mumkin. Bunday holatda, ushbu kodni ularga zinhor oshkor qilmaslik kerak hamda mazkur shaxslar haqida ichki ishlar organlariga xabar berish lozim.

Bank kartasi egasining mobil telefoniga “SMS-xabarnoma” xizmati orqali kelgan maxfiy kodni boshqa shaxslarga oshkor qilmasligi bank kartasidagi mablag‘ning boshqalar tomonidan o‘zlashtirilish imkonini yo‘qqa chiqaradi“, deyiladi Markaziy bank xabarida.

Shuni eslatib o‘tish joiz, plastik kartangizda masofaviy xizmatlardan foydalanish uchun SMS-xabarnomani o‘z telefon raqamingiz orqali ro‘yxatdan o‘tkazishingiz maslahat beriladi. Shunda, plastik kartangiz bilan bog‘liq barcha harakatlar ma’lumoti tegishli raqamingizga SMS orqali kelib turadi.